Гомельскага журналіста-фрылансера Кастуся Жукоўскага суд пакараў штрафам у памеры 80 базавых велічынь

24 лютага суд Жлобінскага раёна разгледзеў адразу два адміністрацыйныя пратаколы па артыкулу 22.9 КаАП (незаконны выраб прадукцыі СМІ), складзеныя мясцовай міліцыяй у дачыненні да гомельскага журналіста-фрылансера Кастуся Жукоўскага. За кожны з пратаколаў суддзя пакарала фрылансера штрафам у памеры 40 базавых велічынь (агулам 80 базавых велічынь, што складае больш за 16 мільёнаў рублёў). Справу разглядала суддзя Валянціна Сапонава.

Згодна міліцэйскім пратаколам, Кастусь Жукоўскі, не маючы акрэдытацыі ў якасці журналіста замежнага СМІ, незаконна праводзіў апытанне і здымкі на відэакамеру жыхароў Жлобіна і раёна. Сюжэты аб праблемах рэгіёну былі паказаны ў эфіры тэлеканалу «Белсат». Гаворка ў відэасюжэтах ішла пра праблемы жыхароў вёскі Рудзенка, якія не маюць працы з-за працяглага рамонту на мясцовай ферме, і цяжкім фінансавым становішчы прамысловага гіганту – Беларускага металургічнага заводу.

На пачатку судовага паседжання пры ўдакладненні пашпартных дадзеных суддзя спыталася ў фрылансера – ці мае ён на ўтрыманні яшчэ нейкіх асоб, акрамя непаўналетняй дачкі? «Прэзідэнта, і іншых дзяржаўных служачых», - адказаў Кастусь Жукоўскі. Ён не прызнаў сваю віну, сцвярджаючы, што не мае працоўных стасункаў з тэлеканалам «Белсат», а відэа здымае, рэалізуючы сваё канстытуцыйнае права на збор і распаўсюд інфармацыі. Відэа ён змяшчаў на сваім блогу, і выкарыстаць яго пры сённяшніх інфармацыйных тэхналогіях мог хто заўгодна, у тым ліку і тэлеканал «Белсат». «Я вінаваты, канечне, у тым, што збіраю праўдзівыя звесткі і паказваю рэальнасць не такой, як беларускае тэлебачанне. Вінаваты я і ў тым, што не веру беларускаму тэлебачанню, а веру ўласным вачам. Але з «Белсат» я не маю працоўнай дамовы, і вы можаце зрабіць туды запыт і спраўдзіць дадзеную інфармацыю», - адзначыў журналіст.

Сведкамі на судзе выступалі жыхары вёскі Рудзенка, якіх апытваў фрылансер. Яны паказалі, што ведаюць дадзенага грамадзяніна і сапраўды на камеру расказвалі пра свае праблемы, але не ведалі – для якога менавіта каналу здымае Жукоўскі і не пыталіся ў яго пра гэта. Сведчанні на судзе даваў і міліцыянер – старэйшы ўчастковы інспектар Аляксандр Раманенка. Ён адзначыў, што сюжэт пра Жлобінскі раён быў «выяўлены» ў эфіры тэлеканалу «Белсат» шляхам маніторынгу сеткі Інтэрнэт. Апытваючы жыхароў раёна, міліцыя паказвала ім здымкі, і людзі паказалі, што менавіта Жукоўскі браў у іх каментары. Міліцыянер не здолеў адказаць на пытанне: якія ёсць доказы таго, што фрылансер здымаў для тэлеканалу «Белсат», перадаваў ім матэрыялы, ці нейкім чынам рабіў мантаж іх, вырабляў сюжэт. «У сюжэце з маіх здымкаў выкарыстана толькі недзе 30% матэрыялу, астатняе невядома хто рабіў і здымаў, у тым ліку выкарыстаны здымкі афіцыйных беларускіх тэлеканалаў. Якая падстава сцвярджаць, што гэта мой сюжэт, калі і голас за кадрам іншы, і аўтарам сюжэту пазначаны іншы чалавек, і я не маю дамовы з «Белсатам»? - падкрэсліў Жукоўскі.

Яго адвакат Пётр Барысаў у сваім выступе пералічыў шэраг парушэнняў ПВКаАП, якія дапусцілі міліцыянеры пры складанні пратаколу – не было подпісаў сведак, Жукоўскаму не паведамілі належным чынам пра адміністрацыйны працэс і гэтак далей. Таксама адвакат прасіў зрабіць запыт на тэлеканал «Белсат», каб мець аб'ектыўныя доказы, што яго падабаронны сапраўды працуе на дадзены тэлеканал. «Не знайшлося пацвярджэння таго, што ў дзеяннях майго падабароннага ёсць склад правапарушэння, прадугледжанага артыкулам 22.9 КаАП», - рэзюмаваў Пётр Барысаў.

Фрылансер на сканчэнне працэсу сказаў, што «гэта цырк і здзек з закону, і я чакаю час, калі суддзі будуць сапраўды незалежныя і будуць кіравацца законам, а не тэлефонным правам і ўказаннямі зверху».

Жукоўскі неаднаразова быў пакараны рознымі судамі Гомельскай вобласці за журналісцкую дзейнасць. Агулам яго штрафы на дадзены момант перавысілі 70 мільёнаў рублёў.