9-10 снежня ў Беларусі працягваецца пераслед людзей
Затрыманне каля Пушкінскай 15 лістапада. Фота "Радыё Свабода"
9-10 снежня ў Беларусі працягваецца пераслед людзей па палітычных матывах. Праваабаронцы "Вясны" кожны дзень збіраюць факты пераследу па ўсёй краіне: затрыманні, вобшукі і іншыя формы ціску па палітычных матывах.
|
Калі вас ці вашых блізкіх затрымалі, паведамляйце нам праз тэлеграм-бот @viasna_bot ці на гарачую лінію:
|
Мінск
Сябра рады руху «За свабоду» Вікторыя Таболіч стала сведкай у справе, распачатай паводле арт. 366 КК. Раніцай дзясятага снежня ў яе дома прайшоў вобшук, канфіскавалі тэхніку. Таболіч дапыталі ў Следчым камітэце і адпусцілі.
«З раніцы прыехалі дадому, ламіліся ў дзьверы. Цэлы аўтобус людзей у масках і са зброяй, паклалі ўсіх тварам у падлогу. Санкцыя пракурора на вобшук была ад першага снежня», — паведаміла БелаПАН Таболіч.
Магілёў
Дзявятага снежня На мяжы з Літвой затрыманы магілёўскі актывіст Аляксандр Царук, паведамляе MAYDAY. Вядома, што ён спрабаваў выехаць з Беларусі, дзе ён рэгулярна быў аб'ектам для нападак з боку сілавікоў. У дадзены момант, наколькі вядома, над ім "вісяць" сем сутак адміністрацыйнага арышту (усяго ўжо ў Царука звыш месяца адбыцця ў няволі ў 2020 годзе за ўдзел у мірных акцыях пратэсту). Верагодна, актывіста адправілі адбываць арышт па апошняй пастанове суда, які прызначыў Царуку 10 сутак арышту. З іх трое актывіст адбыў да суда, яшчэ сем яму застаецца. Па інфармацыі падпісчыка, Аляксандра Царука адвезлі ў Ашмяны.
Гародня
У Гародні на 72 гадзіны дзявятага снежня затрыманая Настасся Каламейчанка, папярэдне — у межах артыкулах 369 Крымінальнага кодэксу. У сваім інстаграме яна зрабіла допіс пра адну з амапавак, якая праходзіць пацярпелай па справе Марыны Палікарпавай.
Карэлічы
У Карэлічах дзявятага снежня затрымалі заснавальніцу і рэдактарку рэгіянальнага сайта Korelichi.by Караліну Князькову, а таксама яе бацькоў, паведамляе БАЖ. Дома ў дзяўчыны быў ператрус, канфіскавалі тэхніку. Цяпер Караліна застанецца ў ізалятары да суду, затрыманых бацькоў абяцаюць да вечара адпусціць.
«Праблемы пачаліся да выбараў, калі на сайце Korelichi.by зьявіўся анонс пікетаў Ціханоўскай», — расказала Караліна Князькова перад сваім затрыманьнем.
Калодзішчы
У Калодзішчах дзявятага снежня затрыманы Святаслаў Лепешаў.
