Байкеры адбілі ў ціхароў свайго – цяпер ім пагражае зняволенне
Патасоўка байкераў з невядомымі. Скрыншот з відэа
У судзе Савецкага раёна Мінска 19 лютага працягнуўся судовы працэс па крымінальнай справе сталічных байкераў.
На лаве падсудных – Андрэй Іванюшын, Мікіта Афанасьеў, Мікіта Траццякевіч. Усіх іх абвінавачваюць у гвалце ў дачыненні да супрацоўнікаў міліцыі па арт. 364 КК РБ.
Інцыдэнт адбыўся 19 верасня каля ГЦ "Еўропа", калі невядомыя сталі затрымліваць аднаго з матацыклістаў, а астатнія пачалі яго абараняць.
Справу разглядае суддзя Аляксандр Воўк. Дзяржабвінаваўца - пракурор Рабаў.
Пацярпелыя па справе - супрацоўнікі міліцыі Новікаў, Іваноў, Пятроў і Максімаў.
Многіх байкераў-сведкаў неаднаразова дапытвалі пад час адбыцця арышту ў ЦІП
У пятніцу былі дапытаныя сведкі здарэння – байкеры і відавочцы падзей каля ГЦ “Еўропа”.
Ілля Сарокін распавёў, што быў абвешчаны мотапрабег, да якога вырашыў далучыцца. Убачыў бойку, матацыклаў было шмат, прыкладна больш 50.
- Што за бойку бачылі?
- Да серабрыстага Фольксваген Пола падыйшоў натоўп людзей. Людзі ў цывільным садзіліся ў машыну. Памятаю, што былі людзі ў чырвонай балаклаве і белым шлеме. Далей людзі селі ў машыну, астатнія паспрабавалі яе адкрыць.
- Названыя па вопратцы людзі спрабавалі адкрыць аўто?
- Дакладна сказаць не магу.
Адвакат пытаецца, ці даставаў нехта людзей з аўто?
-Там дзверы былі адкрыты, з боку кіроўцы, не магу сказаць, што нехта кагосці выцягнуў. Нават не зразумеў, адкуль з'явіўся чалавек з пісталетам.
- А што за чалавек, які дастаў пісталет, адкуль з'явіўся?
- Худы, са шчаціннем, быў у чорнай куртцы, з барсеткай, з якой даставаў пісталет.
- Што ён рабіў з гэтыя пісталетам?
-Папярэджваў. Па рухах было зразумела, што настроены агрэсіўна.
- Дзяржашны нумар аўтамабіля памятаеце?
- Па-мойму там быў не Менскі рэгіён.
Сведка Канстанцін Кандраф'еў таксама знаходзіўся каля ГЦ «Еўропа», быў на матацыкле:
- З вялікай адлегласці назіраў групу матацыклістаў, якія з кімсці нешта высвятлялі.
Адваката Іванюшына пытаецца:
- Бачылі бойку людзей у чорным, з кім?
-Спрабавалі высветліць адносіны з матацыклістамі. Было 4-5 чалавек. Асабліва ніхто не запомніўся.
- Можа экіпіроўкай вылучаліся?
- Не памятаю.
- На колькі было шумна?
- Было шумна, на паркоўцы было шмат матацыклаў.
Сведка Аляксандровіч узгадаў, што бачыў мужчыну ў белым шлеме, яго вялі, спытаў, што адбываецца, сказалі, што скраў тэлефон, я папрасіў выклікаць міліцыю. Убачыў, што з боку Банголора рухаецца натоўп людзей, убачыў амапаўцаў…
- У судзе над байкерамі. Фота: auto.onliner.by
Дапытваюць сведку Андрэя Несцяркова:
- З-за чаго пачалася бойка?
- Была спроба затрымаць ўдзельніка, яго спрабавалі не аддаць.
Запытваецца адвакат:
- Бачылі падзеі з удзелам байкераў?
- Не бачыў.
- Па якіх прыкметах вызначылі затрыманне?
- Чалавека вялі ў мікрааўтобус.
- Як давалі паказанні?
- У ІЧУ Жодзіна падчас адбыцця адміністрацыйнага арышту.
Марыя Гаўдзій, якая была сведка падзей патлумачыла суду, што праз два дні да яе прыехалі супрацоўнікі ГУБОПік і дапыталі.
- Каго запомнілі, хто перашкаджаў выезду?
- Мужчына ў чырвонай балаклаве, падчас мотапрабегу казаў, што варварства дапускаць нельга. Астатніх не памятаю.
- Якім чынам перашкаджалі?
- Сталі ззаду і ўперліся рукамі ў багажнік.
- Іншыя дзеянні?
- Не бачыла.
-Куды паехалі?
- Прайшлі да машыны, ён мне перадаў ключы ад матацыкла, папрасіў перагнаць.
- Незнаёмы чалавек даў ключы, як так?
- Сама не ведаю. Дакументы аддаў аднаму чалавеку, ключы мне, ехалі побач у калоне.
- Як далёка павялі і куды?
- У машыну. Мяне на ёй і забіралі праз два дні, Пола серабрысты.
- Ці далучалі нейкія фота і відэа ў момант допыту?
- Так, тэлефон канфіскавалі і знайшлі некалькі фота з тэлефона, можна сказаць, што вымушаная была далучыць.
З пказанняў сведак бачна, што іх дапытвалі на ЦІП, падчас адбыцця адміністрацыйнага арышту, маюцца сведчанні, што кожнага з іх дапытвалі не па адным разе, у пратаколах згаданыя толькі адзінкавыя допыты кожнага з іх. Ёсць падазрэнні, што і сведкі Гаўдзій Марыю дапытвалі пры такіх жа абставінах.
У судзе вывучаюць паказанні сведкаў, дадзеныя пад час следства.
Паказанні сведкі Сарокіна не значна адрозніваюцца ад сённяшніх.
-Пасля прагляду відэа, які быў стан?
- Даваў паказанні ў ЦІП, быў стрэс - не мыўся 5 дзён.
- Колькі дзён прайшло, як вы давалі паказанні будучы ў ЦІП (суддзя робіць заўвагу, адвакат кажа пра магчымае псіхалагічнае ўздзеянне ў ЦІП)
- У ЦІПе аказвалі ціск? (пытанне здымаецца)
- У пратаколе пазначана, што ў ЦІПе быў допыт?
- Не, не пазначана.
У судзе зачытваецца пратакол агляду аўтамабіля “Фольксваген Пола”. Называюцца ўвагнутасці, пашкоджанне шчотак шклоачышчальніка, драпіна на левым пярэднім крыле.
Відэадоказы не нашмат праяснілі сутнасць канфлікту
Таксама 19 лютага ў судзе былі прагледжаныя відэадоказы. Што характэрна, на адным з відэа з заклікамі блакаваць аўтамабіль, гвалту да супрацоўнікаў не назіраецца. Аднак з'яўляецца чалавек з пісталетам, хаця не відаць, каб ён вылез з аўто.
На другім запісу бачна, як дзяўчаты абараняюць байкераў, без гвалту, на відэа ўжо падышлі амапаўцы і людзі ў аліўкавай форме
Далей - невядомыя ў цывільным спрабуюць выкрасці байкера у белым шлеме, а дзяўчаты не даюць яго затрымаць.
Дэманструецца відэа з тралейбуса. Бачныя адкрытыя пярэднія дзверы аўто. Адвакат Траццякова хадайнічае аб стоп кадры на 06:36. Дакладна бачна, што нумар на Фольксваген Пола не адпавядае заяўленаму ў пратаколах.
Пасля вывучэння відэадоказаў Іванюшын сябе не пазнаў, верагодна, на адным з відэа ён стаіць, Траццякевіч гэтак жа не пазнаў. Афанасьеў быццам бы на адным з відэа стаіць за машынай з заплечнікам. Адвакат Іванюшына кажа, што з таго ракурсу, дзе стаяў яе падабаронны, ён не мог здзяйсняць таго, што яму прад'яўляюць.
Справа сталічных байкераў: што кажуць пацярпелыя супрацоўнікі міліцыі?
