Міліцыя ізноў цікавіцца Ігарам Банцэрам, перавод Пушкіна ў СІЗА: хроніка палітычныга пераследу 28 красавіка Дапоўнена

Праваабарончы цэнтр "Вясна" працягвае збіраць факты палітычнага пераследу. Грамадзянаў забіраюць з дома, затрымліваюць на дваравых маршах,  адбываюцца вобшукі і допыты. Улады ўзмацняюць розныя формы ціску на людзей за іх актыўную грамадзянскую пазіцыю і незадаволенасць дзеяннямі ўладаў.

Стала вядомай дата суду над актывістамі «Еўрапейскай Беларусі» і Паўлам Севярынцам

Працэс пачнецца ў Магілёўскім абласным судзе 12 траўня.

12 траўня ў Магілёўскім абласным судзе пачнецца разгляд справы актывістаў грамадзянскай кампаніі «Еўрапейская Беларусь» Яўгена Афнагеля, Паўла Юхневіча, Дзмітрыя Казлова, Максіма Вінярскага і Андрэя Войніча, інфармуе тэлеграм-канал кампаніі.

Разам зь імі таксама будуць «судзіць» сустаршыню аргкамітэту па стварэньні партыі Беларуская хрысьціянская дэмакратыя Паўла Севярынца і грамадзкую актывістку Ірыну Шчасную.

Мастака Алеся Пушкіна сёння перавязуць з Гродна ў Мінск ў СІЗА на Валадарцы. Верагодная прычына — аб'яднанне “справы Пушкіна” са справай "Саюза палякаў", паведамляе @belsat.

Пушкіна вінавацяць паводле арт.130 ч.3 КК (распальванне нацыянальнай, расавай ды іншай варажнечы) за партрэт антысавецкага партызана. Мастаку пагражае да 12 гадоў турмы.

У Калінінградскай вобласці Расеі затрымалі актывіста з Буда-Кашалёва Івана Саўціна. Увосень на яго завялі некалькі крымінальных спраў. Ён з'ехаў за мяжу.

Увосень, калі ў Гомелі і вобласці праходзілі акцыі пратэсту, Іван Саўцін браў у іх удзел, у тым ліку як валанцёр. У верасні яго арыштавалі за ўдзел у недазволенай акцыі на 15 сутак. Потым Саўцін з'ехаў за мяжу. Дакладна вядома, што адна з крымінальных спраў — за непраўдзівае паведамленне пра небяспеку (артыкул 340 Крымінальнага кодэксу), піша Радыё Свабода.

Чатыры тэлеграм-каналы з Віцебшчыны прызналі экстрэмісцкімі. Гэта —  “Орша 97%”, “Наваполацк і Полацк 97%”, “Партызаны” і “Vitebsk_Юг”. Міліцыя займаецца пошукам адміністратараў тг-каналаў, якія прызнаныя экстрэмісцкімі.

“Ліда 97%” таксама прызнаная экстрэмісцкім тэлеграм-чатам. Адпаведнае рашэнне прыняў суд Лідскага раёна.

Гародня

Гарадзенскага музыку і палітзняволенага Ігара Банцэра шукаюць міліцыянты. Беларускае Радыё Рацыя паведамляе, што Ігар здзіўлены тым, што яго пачалі па тэлефоне выклікаць у міліцыю:

– Супрацоўнік міліцыі не назваўся, сказаў, што тэлефануе з Ленінскага РАУСа, каб сказаць, што ў мяне нейкія неаплачаныя штрафы.

Па словах Ігара, пасля тэлефанаванняў пад вокнамі памяшкання, дзе ён знаходзіўся,  пачалі з’яўляцца міліцыянты і людзі ў цывільным:

– Пачалі нейкія дзіўныя „спадары” хадзіць пад вокнамі. Прыехала машына з Ленінскага РАУСа. У мяне нібыта нейкі неаплачаны штраф.

Гарадзенку Таццяну Тарун выклікалі сёння ў Следчы камітэт. Папярэдне вядома, што выклік звязаны з абразай у адным з тэлеграм -каналаў супрацоўніка міліцыі.

Інфармацыя будзе дапаўняцца.