Два гады "хатняй хіміі" — за абразу Лукашэнкі
Трэцяга чэрвеня Цэнтральны суд Мінска вынес прысуд 49-гадоваму Сяргею Пракопчыку. Яго прызналі вінаватым паводле ч. 1 арт. 368 і асудзілі да двух гадоў абмежавання волі без накіравання ў папраўчую ўстанову — "хатняй хіміі".
Справу разгледзеў суддзя Дзмітрый Карсюк, дзяржабвінавачанне падтрымаў пракурор Арцём Цвяткоў. Пракопчык абараняў сябе сам.
"Не разумеў, як супрацоўнікі могуць так сябе паводзіць"
Сяргея Пракопчыка прызналі вінаватым у тым, што ў ліпені 2019 г. і верасні 2020 г. ён размясціў на сваёй старонцы ў сацсетцы "Вконтакте" фотаздымкі Лукашэнкі з непрыстойнымі каментарамі: тэкст змяшчае ненарматыўную лексіку, таму не быў зачытаны ў судзе.
Сяргей Пракопчык цалкам прызнаў віну і тое, што каментары змяшчаюць абразу ў адрас Лукашэнкі. Ён разумее, што гэта было недапушчальна. Пракопчык патлумачыў, што размяшчаў фотаздымкі праз эмоцыі. Напрыклад, здымак, на якім Лукашэнка сядзіць у асяроддзі людзей у балаклавах ён запосціў праз эмоцыі, якія ўзніклі ў яго, калі міліцыя збівала людзей, якія выходзілі на пратэсты. На пытанее, ці была ў яго непрыязнасць у бок Лукашэнкі, ён адказаў, што не.
"Я не разумеў, як супрацоўнікі могуць сябе так паводзіць, — патлумачыў Сяргей Пракопчык. — Праз час зразумеў, што магчыма, яны і правільна рабілі, што прымянялі сілу: я сам працаваў у ахове і разумею, што калі-некалі гэта неабходна. У дадзены момант у мяне негатыўныя адносіны да запісаў. Зараз у мяне артымія, проста хочацца, каб гэта ўсё закончылася хутчэй. Больш не збіраюся нічога пісаць, хачу спакойна жыць. Раскайваюся і прашу прабачэння".
Не той тэлефон
Да матэрыялаў справы быў далучаны не той сродак сувязі, з дапамогай якога размяшчаліся запісы: тэлефон, пазначаны ў справе, быў куплены толькі ў лютым 2021 года.
Таксама ў матэрыялах справы — рапарт аб высвятленні асобы, якая пакінула запісы, скрыншоты старонкі Пракопчыка. У высновах эксперта — пацвярджэнне ненарматыўнасці выкарыстанай у каментарах лексікі і негатыўнай ацэнкі Лукашэнкі.
Што казалі ў спрэчках?
Дзяржабвінаваўца ўпэўнены, што дзеянні кваліфікаваныя правільна. Аднак папрасіў выключыць з абвінавачання тое, што сродкам, з якога былі адпраўленыя каментары, з'яўляецца далучаны да справы тэлефон. З абвінавачання ён таксама папрасіў выключыць тое, што Лукашэнку былі прычыненыя маральныя пакуты: ён не прысутнічаў на паседжанні, таму не было магчымым дапытаць яго па гэтым пытанні і даказаць пакуты.
Суддзя Карсюк таксама вынес дзве прыватныя пастановы: першая — за дрэнна праведзеныя следчыя дзеянні наконт тэлефона; другая — у адрас кіраўніцтва трамвайнага парку, працаўніком якога з'яўляецца Пракопчык, за недастаткова праведзеную прафілактычную працу.
