Справа Сакалоўскага: амапаўцы адмаўляюцца ад матэрыяльных патрабаванняў Дапоўнена
У Кастрычніцкім судзе Гародні 12 ліпеня працягваецца разгляд крымінальнай справы Андрэя Сакалоўскага. Яго вінавацяць па некалькіх артыкулах Крымінальнага кодэксу: арт. 342 КК РБ (арганізацыя або актыўны ўдзел у групавых дзеяннях, якія груба парушаюць грамадскі парадак) і 364 КК РБ (гвалт альбо пагроза прымянення гвалту ў дачыненні да супрацоўніка органаў унутраных спраў).
Справу разглядае суддзя Маргарыта Ланцэвіч. Дзяржаўны абвінаваўца – пракурор Віктар Нічыпарук.
Справу маніторыць правааабаронца Раман Юргель.
Па матэрыялах следства, 6 верасня 2020 года на вуліцы Гарнавых у Гродна Сакалоўскі, знаходзячыся ў счэпцы грамадзян, аказаў відавочнае непадпарадкаванне супрацоўнікам АМАПа, з групай асобаў перашкаджаў супрацоўнікам міліцыі выконваць іх абавязкі. У ходзе групавых дзеянняў актыўна, з помсты, меў намер прычыніць боль 11 пацярпелым амапаўцам, пагражаў іх асабістай бяспецы.
Андрэй Сакалоўскі сябе вінаватым не прызнае.
На папярэдніх судовых пасяджэннях дапытвалі пацярпелых амапаўцаў. Яны блыталіся ў паказаннях, супярэчылі сваім ранейшым паказанням, адмаўляюцца ад сваіх ранейшых матэрыяльных патрабаванняў да абвінавачванага.
Гародня: Адзінаццаць пацярпелых амапаўцаў блытаюцца ў паказаннях, суд здымае матэрыяльныя пазовы
12 ліпеня пацярпелыя з'явіліся на пасяджэнне суда для прагляду відэазапісу, прагляду і апытання суддзёй і адвакатам.
Дзяржабвінаваўца апавяшчае пратакол агляду запісу: відэа дыск з камеры відэаназірання з вул. Гарнавых за 6 верасня. На відэазапісе бачнае няўзгодненае масавае мерапрыемства, дзе Сакалоўскі бачны ў натоўпе людзей з дзіцём. Зафіксавана таксама сутыкненне людзей і барацьба паміж Сакалоўскім і АМАПам. Сакалоўскі затым ідзе да прыпынку грамадскага транспарту.
5 пацярпелых - Вавілонаў, Белы, Латкоў, Аскерка, Дмухоўскі - праглядаюць відэа. Яны ў чорных балаклавах.
Адвакат запытвае, хто сябе ўбачыў на відэа і апазнаў?
Усе пяцёра сябе ўбачылі і апазналі. Кажуць, што ўбачылі Сакалоўскага.
Адвакат просіць кожнага з пацярпелых, назваць свае дзеянні ў адносінах да Сакалоўскага.
Белы: “Я стаяў у першым ланцугу. Сакалоўскага на відэа магу апазнаць”.
Адвакат удакладняе ў Белага:
- Дзе Сакалоўскі вам наносіць цялесныя пашкоджанні, дзе гэта на відэа? Пазоў падтрымліваеце?
- Так.
Адвакат: "Але Сакалоўскі вам не наносіў ўдары, а ў вашым пазове паказана, што менавіта Сакалоўскі прычыніў вам цялесныя пашкоджанні? Ёсць разыходжанні ў вашых паказаннях і ў пазове! Вы адмаўляецеся ад пазову?"
- Я адмаўляюся ад пазову!
Суддзя абвясціла пастанову: прыняць адмову ад пазову Белага, вытворчасць па пазову спыніць.
Далей пытанні адваката пацярпеламу амапаўцу Латкову.
- Па якіх прыкметах вы апазналі сябе на відэа?
- Пазнаў сябе.
- Сакалоўскі на відэа прычыняў вам пабоі, пашкоджанні?
- Ён адштурхоўваўся, я штурхаў, затрымліваў Сакалоўскага іншы супрацоўнік.
- У пазове, вы паказалі, што Сакалоўскі наносіў вам ўдары. Што адпавядае рэчаіснасці, вашы паказанні ў судзе, у пратаколе або ў пазове? Вы падтрымліваеце пазоў?
- Так. Пры затрыманні Сакалоўскі ўпіраўся. На відэа, ёсць фрагмент, дзе я яго затрымліваю.
Латкоў зноў глядзіць відэа, шукае той момант.
Латкоў паказвае фрагмент, дзе Сакалоўскі, нібыта штурхае амапаўца Латкова, у чорным, у балаклаве.
Адвакат:
- А ў чым вашыя пакуты ад дзеянняў Сакалоўскага. Вы не зафіксавалі пабоі, да лекара не звярталіся?
- Пабоі не фіксаваў, да лекараў не звяртаўся, дакументальна пазоў не магу пацвердзіць.
Адвакат: “У вас розныя тлумачэння ўсюды. Чаму вы не сфармулявалі свае іскавыя патрабаванні? Чаму следчаму аб гэтым не гаварылі?
- Следчы сказаў мне, што дасцё паказанні, што ўсюды былі ў той дзень у горадзе.
Адвакат:
- Суд не можа вас дакладна ідэнтыфікаваць, вы былі ў чорным. Ад пазову вы адмовіліся ў мінулы раз. Следчы з вамі размаўляў без балаклавы, то якія вашы паказанні з'яўляюцца сапраўдныя?
- Усе сапраўдныя. Паказанні мае былі толькі па Берасці.
- А якое дачыненне вы маеце да справы Сакалоўскага?
- Спытайцеся ў следчага.
Пасля прагляду відэазапісу пацярпелым Ігарам Мінько, пракурор запытаўся пра ягоныя дзеянні і Сакалоўскага.
Адвакат супраць пытання, бо на папярэднім допыце Мінько сказаў у судзе, што не бачыў яго. На відэа таксама не апазнае Сакалоўскага. Пазову не прад’яўляў.
Паколькі сёння на суд не з’явіліся пацярпелыя Лісаў і Базылевіч, суддзя пастанавіў выклікаць іх паўторна і працягнуць судовае пасяджэнне ў 14-45 15 ліпеня.
