Новыя затрыманні аналітыкаў у Беларусі. Хроніка пераследу 4 жніўня Дапоўнена

Праваабарончы цэнтр "Вясна" збірае факты палітычнага пераследу па ўсёй краіне за чацвёртага жніўня. Людзей працягваюць затрымліваць па крымінальных справах, праводзіць вобшукі і ўжываць іншыя формы ціску за іх актыўную пазіцыю. 

Мінск

Ранкам супрацоўнікі КДБ прыйшлі з ператрусам да філосафа і метадолага, заснавальніка Лятучага ўніверсітэту Уладзіміра Мацкевіча. Яго прававы статус пакуль невядомы.

Уладзімір Мацкевіч

Таксама ператрусы адбыліся ў каардынатаркі Лятучага ўніверсітэту, аналітыка і сацыёлага Таццяны Вадалажскай і паплечніка Мацкевіча, былога кіраўніка EuroBelarus Улада Вялічкі. Абодвух пасля ператрусаў затрымалі і павезлі ў Следчы камітэт. Вядома, што ў пастанове на вобшук у кватэры Вялічкі значылася больш за дзясятак артыкулаў Крымінальнага кодэксу. 

Дапоўнена: Таццяну Вадалажскую пакідаюць у ізалятары часовага ўтрымання на Акрэсціна. Яна затрымана на 10 дзён у межах крымінальнай справы. Улад Вялічка ўвечары выйшаў на волю.

Таксама стала вядома, што з сярэдзіны дня на сувязь не выходзіць Аксана Шэлест — сацыёлаг, калега Уладзіміра Мацкевіча і Таццяны Вадалажскай. Верагодна, яна таксама затрыманая, піша ў Facebok Андрэй Ягораў.

Як паведамляе МУС, у Мінску ў межах крымінальнай справы, звязанай з пратэстамі мінулага года, з другога па чацвёртае жніўня затрыманы 11 чалвек. "Вясне" вядома пра затрыманне Андрэя Юніка, Артура Джыгеры. Прозвішчы астатніх удакладянюцца.

Паведамляецца пра затрыманне ў Мінску Андрэя Яроцкага, Віталя Кабака (выклікалі ў Першамайскі РУУС, і адтуль ён не выйшаў).

У Маладзечне затрыманы дырэктар мясцовай фірмы. Згодна з паведамленнем МУС - за заклікі да ўдзелу ў пратэстаў і "зліў" дадзеных. Супраць мужчыны ўзбуджана крымінальная справа аб групавых дзеяннях, груба парушаючых грамадскі парадак.

"Вясне" стала вядома, што палітычны зняволены Дзмітрый Кулакоў збег з «хіміі» і з'ехаў з Беларусі. Зараз ён знаходзіцца ў іншай краіне.

Дзмітрыя асудзілі на 3 гады і 6 месяцаў абмежавання волі з накіраваннем у папраўчую ўстанову адкрытага тыпу за тое, што ён абражаў і пагражаў гвалтам супрацоўнікам міліцыі ў тэлеграм-чаце. Мужчына адбываў пакаранне ў папраўчай установе адкрытага тыпу №49 у Шклове.

Супраць Вольгі Вялічка, кіраўніцы гарадзенскага дзіцячага хоспіса, завялі другую крымінальную справу. Гэтым разам Вольгу абвінавачваюць ва ўдзеле ў маршы пратэсту — «выходзіла на праезную частку, блакуючы рух, а таксама стаяла "ў счэпцы", аказваючы непадпарадкаванне законным патрабаванням міліцыянтаў» (артыкул 342 Крымінальнага кодэксу).

Раней на Вольгу завялі крымінальную справу за «незаконнае выкарыстанне спонсарскай дапамогі».

Вольга Вялічка

У  Ваўкавыску быў затрыманы адзін з намеснікаў старшыні партыі «Беларускі Народны Фронт» Юрась Меляшкевіч. Пра гэта паведаміў у Фэйсбуку Вадзім Саранчукоў.

У праваабаронцы з Бярозы Сяржука Русецкага прайшоў ператрус, падчас якога быў выняты тэлефон. Сам Русецкі на волі.

Сяржук Русецкі. Фота "Радыё Рацыя"

Будзе дапоўнена