Прыходзіць наглядчык і б'е па ракавіне палкай. Палітзняволеная Міа Міткевіч распавяла пра ціск у жодзінскай турме
Палітзняволеная арт-дырэктарка івэнт-агенцтва Міа Міткевіч, якую асудзілі па арт. 130 Крымінальнага кодэкса на тры гады калоніі за допісы пра міліцыянтаў "ВКонтакте", распавяла пра ціск у жодзінскай следчай турме. Акрамя маральнага ціску, у камеру прыходзіць наглядчык і б'е палкай па ракавіне. Пра гэта "Вясне" паведаміла маці Міі.
- Міа Міткевіч. Фота з сацыяльных сетак
Таксама, як распавядае маці Міі, пры этапаванні з СІЗА-1 у Жодзіна ў яе дачкі выбілі плячо. Яна напісала заяву, каб зафіксаваць гэты факт, але ніхто нічога не зрабіў. Вядома, што ў турме яе ўдарылі па назе палкай. Раней Міа распавядала, што ў камеры было вельмі горача, ім не адчынялі вокны, а ад сваякой не прымалі вентылятары.
У турме, акрамя маральнага ціску, наглядчык запалохвае Мію: б'е палкай па ракавіне.
"Навошта – можна толькі здагадвацца", – кажа маці Міі.
Таксама, па словах маці, у дзяўчыны пачаліся вялікія праблемы са здароўем:
"Кашаль моцны, капіляры лопаюцца, галаўныя болі, абвастрыліся гінекалагічныя захворванні, зрок упаў. Падобна, што быў мікраінсульт".
Яшчэ перад судом 14 траўня ў Мінску Мію паставілі ў жодзінскай турме на прафілактычны ўлік "як асобу схільную да экстремізму."
У пятніцу, 6 жніўня, у Вярхоўным судзе будзе разглядацца апеляцыйная скарга на прысуд Міі Міткевіч. Старшынствуючым па справе прызначаны суддзя Пётр Лістраценка.
Нагадаем, 20 траўня Мінскі гарадскі суд асудзіў да трох гадоў калоніі агульнага рэжыму па частцы 1 артыкула 130 Крымінальнага кодэкса 29-гадовую менеджэрку ў сацыяльна-культурнай сферы, арт-дырэктарку івэнт-агенцтва Nuestro Amor Мію Міткевіч. Суддзя Алена Шылько абвінаваціла дзяўчыну ў распальванні сацыяльнай варожасці ў дачыненні да міліцыянтаў трыма допісамі "ВКонтакте". Пра допісы дзяўчыны ў сацсетцы міліцыі стала вядома з закрытага тэлеграм-чата. У Міткевіч дзве вышэйшыя адукацыі ў сферы культуры. Дзяўчына прызнала факт напісання пастоў, але сцвярджае, што не хацела распальваць варожасць да міліцыянтаў, бо нават "не разумее, што ёсць прыкмета сацыяльнай прыналежнасці". Дзяржаўнае абвінавачанне падтрымліваў пракурор Аляксандр Рамановіч.
Падрабязнасці пра суд:
За тры допісы "ВКонтакте" пра міліцыянтаў культурнай менеджэрцы пагражае да пяці гадоў калоніі
Культурную менеджэрку асудзілі на тры гады калоніі за допісы "ВКонтакте" пра міліцыянтаў
