«Грамадзянскую супольнасць у Беларусі чакаюць новыя рэпрэсіі і пераслед». Агляд зменаў у законы Беларусі за апошні год
Марш міру і незалежнасці 30 жніўня 2020. Фота з телеграм-канала Фатографы супраць
Пасля пачатку масавых выступаў грамадзян падчас выбарчай кампаніі, якая стартавала ў траўні 2020 года, у шматлікіх гарадах Беларусі рэпрэсіі ўзмацніліся, працягвалі актыўна ўжывацца ў поствыбарчы перыяд і не спыняюцца дагэтуль.
У сваім імкненні любымі шляхамі здушыць пратэсты ў краіне ўлады звяртаюцца да самых шырокіх і разнастайных формаў рэпрэсій, уключаючы звальненні з працы, адлічэнні з навучальных установаў і нават гвалтоўнае выдварэнне з краіны лідараў апазіцыі і прадстаўнікоў грамадзянскай супольнасці. Крымінальны пераслед грамадзянаў стаў адным з асноўных відаў такіх рэпрэсій.
Праваабаронцы «Вясны» прааналізавалі ўнесеныя за апошні год змены ў законы Беларусі па пытаннях крымінальнай і адміністрацыйнай адказнасці, пра экстрэмізм, пра сілавыя ведамствы, пра масавыя мерапрыемствы і СМІ з пункту гледжання іх уплыву на сітуацыю з правамі чалавека і асноўнымі свабодамі.
Юрыст «Вясны» Павел Сапелка адзначае, што ўлады дапускаюць масавыя і сістэмныя парушэнні правоў чалавека, а прававая сістэма не ў сілах забяспечыць належную прававую абарону парушаных правоў і цалкам пераарыентаваная на рэпрэсіі і пераслед іншадумцаў.
«Шмат якія з сумнеўных з пункту гледжання права, адкрыта незаконных падыходаў, што выкарыстоўваліся следчымі органамі ў перыяд барацьбы з іншадумцамі ў перыяд гэтага крызісу, ляглі пазней у аснову рэпрэсіўных зменаў у нацыянальнае заканадаўства. У прыватнасці — у законы пра процідзеянне экстрэмізму, пра недапушчэнне рэабілітацыі нацызму, пра СМІ і масавыя мерапрыемствы, у Крымінальны кодэкс і іншыя», — падкрэсліў праваабаронца.
