Вынесены прысуд "вясноўцам" Леаніду Судаленку і Таццяне Ласіцы: тры і два з паловай гады калоніі

У судзе Цэнтральнага раёна г. Гомеля 3 лістапада агучылі прысуд па крымінальнай справе ў дачыненні да праваабаронцы “Вясны” Леаніда Судаленкі і валанцёркі арганізацыі Таццяны Ласіцы.

Суддзя Сяргей Салоўскі прызнаў Леаніда Судаленку і Таццяну Ласіцу вінаватымі ў арганізацыі і падрыхтоўцы дзеянняў, што груба парушаюць грамадскі парадак (ч. 1 арт. 342 КК), і навучанні і падрыхтоўцы асобаў для ўдзелу ў такіх дзеяннях, а таксама іх фінансаванні або іншым матэрыяльным забеспячэнні (ч. 2 арт. 342 КК) і асудзіў Леаніда Судаленку на тры гады пазбаўлення волі з адбываннем пакарання ў папраўчай калоніі ва ўмовах агульнага рэжыму, а Таццяну Ласіцу - на два з паловай гады пазбаўлення волі з адбываннем пакарання ў папраўчай калоніі ва ўмовах агульнага рэжыму.

13 кастрычніка па тры гады калоніі для Леаніда і Таццяны запрасілі пракуроры Яўген Фартушняк і Кірыл Вышнякоў. Для валанцёркі Марыі Тарасенка, якая праходзіла па гэтай жа крымінальнай справе і была пад падпіскай аб нявыездзе, бок дзяржабвінавачвання запрасіў два з паловай гады калоніі. Пасля гэтага Марыя была вымушаная з’ехаць з Беларусі. 

На судзе пракуроры прасілі месяц для вылучэння крымінальнай справы супраць Тарасенка ў асобную вытворчасць, але суддзя Сяргей Салоўскі даў на гэта толькі тыдзень. 26 кастрычніка на судзе аднавілася судовае следства па крымінальнай справе супраць Леаніда Судаленкі і Таццяны Ласіцы: наноў адбыліся спрэчкі бакоў, абвінавачаныя “вясноўцы” выступілі з апошнім словам.

Нагадаем, суд над праваабаронцам Леанідам Судаленкам і валанцёркамі “Вясны” Таццянай Ласіцай і Марыяй Тарасенка распачаўся 3 верасня і праходзіў у закрытым рэжыме. Леанід і Таццяна знаходзяцца пад вартай з 18 і 21 студзеня 2021 года адпаведна.

Суд над Леанідам Судаленкам, Таццянай Ласіцай і Марыяй Тарасенка праходзіць у закрытым рэжыме

У судзе Цэнтральнага раёна г. Гомеля 3 верасня распачаўся суд над праваабаронцам “Вясны” Леанідам Судаленкам і валанцёркамі арганізацыі Таццянай Ласіцай і Марыяй Тарасенка.

Як распавёў у сваіх лістах на волю Судаленка, у віну яму ставіліся:

• эпізод з дровамі, якія Леанід прывёз дзецям з шматдзетнай сям’і, бацьку якой потым асудзілі за "беспарадкі”;
• відэа на ютубе з "Рудабельскай паказухі", дзе праваабаронца тлумачыць блогеру Андрэю Павуку, што такое пратэст людзей;
• заклік у сацсетках сустрэць з ІЧУ жыхарку Гомеля Марыю Тульжанкову пасля 15 сутак;
• семінар па лічбавай бяспецы для праваабаронцаў;
• аплата штрафаў, пошлін за зварот у суд і дапамогу адвакатаў.

Леанід Судаленка і Таццяна Ласіца прызнаныя палітзняволенымі.