Заява праваабарончых арганізацый аб прызнанні 12 новых палітычных зняволеных

Сумесная заява прадстаўнікоў беларускай праваабарончай супольнасці

27 студзеня 2022 г.

У сувязі з павелічэннем колькасці выпадкаў асуджэння і пазбаўлення волі грамадзянаў краіны па шэрагу дыфамацыйных артыкулаў Крымінальнага кодэкса Рэспублікі Беларусь, а таксама ў сувязі са знявагай дзяржаўных сімвалаў Рэспублікі Беларусь, мы, прадстаўнікі беларускай праваабарончай супольнасці патрабуем спыніць пераслед правамерных форм выказвання меркаванняў, і ў  чарговы раз пацвярджаючы свае неаднаразова выказаныя патрабаванні па дэкрыміналізацыі дыфамацыі і недапушчальнасці пазбаўлення волі грамадзян за абразу службовых асобаў, дзяржавы, дзяржаўных органаў і сімвалаў (супольная заява ад 22 снежня 2020 г.), адзначаем наступнае:

Намі атрыманая інфармацыя пра наступных асобаў, пазбаўленых волі за абразу прэзідэнта, прадстаўнікоў улады (супрацоўнікаў міліцыі), суддзяў і знявагу дзяржаўных сімвалаў:

1. Руслан Сінчукоў асуджаны па арт. 368 КК за абразу А. Лукашэнкі да 1 года пазбаўлення волі ў папраўчай калоніі.
2. Мікалай Берднікаў асуджаны па арт. 369 КК за абразу прадстаўніка ўлады да 2 гадоў абмежавання волі з накіраваннем у папраўчую ўстанову адкрытага тыпу, накіраваны для адбыцця пакарання;
3. Анатоль Выдрын асуджаны па арт. 369 КК за абразу прадстаўніка ўлады да 1 года і шасці месяцаў абмежавання волі з накіраваннем у папраўчую ўстанову адкрытага тыпу, накіраваны для адбыцця пакарання;
4. Дзмітрый Цыб асуджаны па арт. 369 КК за абразу прадстаўніка ўлады да 2 гадоў абмежавання волі з накіраваннем у папраўчую ўстанову адкрытага тыпу, накіраваны для адбыцця пакарання;
5. Мікалай Белазёраў асуджаны па арт. 369 КК за абразу прадстаўніка ўлады да 1 года і шасці месяцаў абмежавання волі з накіраваннем у папраўчую ўстанову адкрытага тыпу, накіраваны для адбыцця пакарання;
6. Мікалай Кавалеўскі асуджаны па арт. 369 КК за абразу прадстаўніка ўлады да 1 года і шасці месяцаў абмежавання волі з накіраваннем у папраўчую ўстанову адкрытага тыпу, накіраваны для адбыцця пакарання;
7. Мікіта Палеонак узяты пад варту па абвінавачванні па арт. 368 і 369 КК за абразу А. Лукашэнкі і прадстаўніка ўлады;
8. Андрэй Корабаў узяты пад варту па абвінавачванні па арт. 368 КК за абразу А. Лукашэнкі;
9. Мікалай Віцікаў узяты пад варту па абвінавачванні па арт. 130 КК – распальванне варожасці за ліст ў раёную газету з прапановамі па канстітуцыйнай рэформе;
10. Алег Канавалаў узяты пад варту па абвінавачванні па арт. 130 КК за каментары па “справе Зельцара” і размяшчэнні ў інтэрнецэ “інфармацыі анцідзяржаўнага толку”;
11. Андрэй Мышкавец узяты пад варту па абвінавачванні па арт. 369 і 130 КК за каментары па “справе Зельцара”;
12. Арцем Жэрнак ўзяты пад варту па обвінавачванні па ч. 3 арт. 293 і арт. 361 КК за падрыхтоўку ўдзельнікаў масавых беспарадкаў і заклікі да мер абмежавальнага характару (санкцый).

У сувязі з гэтым мы лічым пераслед і пазбаўленне волі названых асоб палітычна матываваным, звязаным з мірнай рэалізацыяй выказвання меркавання, а іх саміх палітычнымі зняволенымі ў адпаведнасці з п. 3.1(а) Кіраўніцтва па вызначэнні паняцця “Палітычны зняволены”, і патрабуем ад уладаў Беларусі:

1. Неадкладна вызваліць палітвязняўРуслана Сінчукова, Мікалая Берднікава, Анатоля Выдрына, Дзмітрыя Цыба, Мікалая Белазёрава, Мікалая Кавалеўскага, Мікіту Палеонка, Андрэя Корабава, Мікалая Віцікава, Алега Канавалава, Андрэя Мышкаўца, Арцема Жэрнака і спыніць крымінальны пераслед у дачыненні да іх.
2. Прыняць захады, скіраваныя на дэкрыміналізацыю дыфамацыйных правапарушэнняў і адмену артыкулаў Крымінальнага кодэкса, якія прадугледжваюць адказнасць за абразу дзяржавы, дзяржаўных сімвалаў і службовых асобаў, а менавіта – арт. 188, 189, 367, 368, 369, 369-1, 370, 391 Крымінальнага кодэкса Рэспублікі Беларусь, і спыніць усе раней узбуджаныя па дадзеных артыкулах крымінальныя справы.
3. Неадкладна вызваліць усіх палітычных зняволеных і спыніць палітычныя рэпрэсіі супраць грамадзян краіны.

Праваабарончы цэнтр "Вясна";

Прававая ініцыятыва;

Lawtrend;

Беларускі ПЭН;

Беларускі Хельсінкскі камітэт;

Беларускі дом правоў чалавека імя Барыса Звозскава;

Беларуская асацыяцыя журналістаў.