Памятаеце даішніка Вольніча? Праз яго дагэтуль судзяць людзей
Ігар Вольніч затрымлівае ўдзельніка мірнай акцыі.
Суд Першамайскага раёна Віцебска 14 лютага вынес прысуд па крымінальнай справе Руслана Чэркаса, якога абвінавацілі ў абразе прадстаўніка ўлады – сумнавядомага супрацоўніка ДАІ з Ганцавічаў Ігара Вольніча (арт.369 Крымінальнага кодэкса).
Справу разглядала суддзя Наталля Карабліна.
Абвінавачаны Чэркас адмовіўся ад паслуг адваката і ў судзе абараняў сябе сам.
Пацярпелы Вольніч на судовае пасяджэнне не з’явіўся.
Па матэрыялах абвінавачання, Руслан Чэркас, у перыяд з 28 па 29 чэрвеня 2020 года, знаходзячыся на тэрыторыі горада Мінска і Мінскай вобласці, маючы намер на публічную абразу прадстаўніка ўлады, а менавіта інспектара дарожна-патрульнай службы групы дарожна-патрульнай службы Дзяржаўнай інспекцыі аддзялення ДАІ Ганцавіцкага райвыканкама старэйшага лейтэнанта міліцыі Вольніча у сацыяльнай сетцы “Аднакласнікі”, на агульнадаступнай старонцы карыстальніка "Вольга Карач” у непрыстойнай форма абразіў апошняга з выкарыстаннем ненарматыўнай лексікі, што прыніжае аўтарытэт, гонар і годнасць асобы прадстаўніка ўлады Вольніча ў сувязі з выкананнем ім сваіх службовых абавязкаў.
Сваю віну Чэркас прызнаў цалкам.
Суду паведаміў, што старонку ў “Аднакласніках” завёў даўно, каб сустракацца там са школьнымі сябрамі, саслужыўцамі па арміі.
“Знаходзячыся ў Менску дома ўбачыў фотаздымак супрацоўніка інспекцыі. Там было падпісана, што супрацоўнік аўтаінспекцыі затрымаў мірнага пратэстуючага ну і з улікам таго, што фотаздымак... такім чынам мне не спадабалася дзеянне, што мірнага пратэстуючага затрымалі, таму я так і напісаў… Там затрыманы на зямлі ляжыць, ну затрымалі супрацоўнікі… Ну і напісаў у нецэнзурнай форме, што ён “нехарошы чалавек”.
У суд паступіла заява ад пацярпелага Вольніча, у якой ён просіць яго прызнаць грамадзянскім істцом і спагнаць з падсуднага 1500 бел рублёў у якасці кампенсацыі маральнай шкоды.
У сваім апошнім слове Чэркас заявіў, што гэта для ягонай сям’і вялікія грошы і прасіў суд маменшыць яе да 700 рублёў.
Пракурор запатрабаваў паўтары гады абмежавання волі ва ўстанове адкрытага тыпу.
Такі прысуд яму і вынесла суддзя Карабліна.
