У Наваполацку студэнта асудзілі да 2,5 гадоў калоніі за "навучанне беспарадкам"
7 красавіка 2022 года ў судзе Наваполацка і Наваполацкага раёна вынесены прысуд мясцоваму жыхару – 20-гадоваму Леаніду Шамаву. Справа разглядалася ў закрытым судовым пасяджэнні.
Суддзя Віталь Лапко прызнаў яго вінаватым паводле ч. 3 арт. 293 Крымінальнага кодэкса і асудзіла яго да 2,5 гадоў пазбаўлення волі ў калоніі агульнага рэжыму.
Малады чалавек прызнаны вінаватым у навучанні і іншай падрыхтоўцы асоб для ўдзелу ў масавых беспарадках, якія суправаджаюцца гвалтам над асобай, пагромамі, падпаламі, знішчэннем маёмасці і ўзброеным супрацівам прадстаўнікам улады. Згодна з матэрыяламі справы, 10 і 11 жніўня 2020 года Леанід "наўмысна і супрацьпраўна" сабраў і распаўсюдзіў інфармацыю, прызначаную для гэтых мэтаў. Абвінавачванне было ўпэўненае, што ён распаўсюджваў яе праз тэлеграм-чаты, каб з імі маглі азнаёміцца жыхары Наваполацка і бліжэйшых населеных пунктаў. Да прысуду Шамаў знаходзіўся пад вартай.
Шамаў – студэнт Полацкага дзяржаўнага ўніверсітэта, які ў 2019 годзе заняў першае месца па-за конкурсам на турніры па робататэхніцы "У будучыню праз веды: v5.0", які праходзіў у гэтай ВНУ.
