Тры гады калоніі і 100 базавых штрафу прысудзілі бас-гітарысту гурта TerraKod Віктару Катоўскаму
Віктар Катоўскі.
У Брэсцкім абласным судзе 14 красавіка вынесены прысуд па крымінальнай справе палітвязня, бас-гітарыста гурта TerraKod Віктара Катоўскага.
Справу разглядаў суддзя Мікалай Грыгаровіч, дзяржабвінаваўца - Пакала
Віктар Катоўскі быў затрыманы ў Брэсце 29 верасня 2021 года па крымінальнай справе, узбуджанай за каментары ў інтэрнэце пасля гібелі ў мінскай кватэры супрацоўніка КДБ Дзмітрыя Федасюка і it-спецыяліста Андрэя Зельцэра.
Пасля затрымання знаходзіўся ў ІЧУ на Акрэсціна, пасля быў пераведзены ў Брэсцкае СІЗА-7.
Катоўскага абвінавацілі адразу па трох артыкулах Крымінальнага кодэкса:
- арт. 130 ч.1 - распальванне расавай, нацыянальнай, рэлігійнай альбо іншай сацыяльнай варожасці або варажнечы;
- арт. 369 - знявага прадстаўніка ўлады;
- арт. 368 ч.1 - абраза прэзідэнта Рэспублікі Беларусь.
У справе фігуруюць наступныя эпізоды:
за паведамленне "Шкада амапаўца. Адным дзярмом на зямлі менш" у ноч з 28 на 29 верасня 2021 - абраза прадстаўніка ўлады;
за каментар "Хлопец-герой. Жыццё паклаў у барацьбе з гэтымі казламі нягледзячы на наяўнасць сям'і " - артыкул "распальванне сацыяльнай варожасці";
за фразу "Шызоід вусаты" ў кастрычніку 2020 года - артыкул "абраза прэзідэнта РБ".
Па сукупнасці трох артыкулаў суд пастанавіў пакараць Катоўскага пазбаўленнем волі тэрмінам на тры гады ў калоніі агульнага рэжыму і штрафам у памеры 100 б. в. альбо 3 200 рублёў.
Менавіта столькі і запрасіла абвінавачанне на папярэднім пасяджэнні 12 красавіка.
