Ціск на палітзняволеных, новыя экстрэмісты і затрыманні: хроніка пераследу 21 красавіка Дапоўнена
У Беларусі па-ранейшаму працягваюцца затрыманні, ператрусы, катаванні ў ізалятарах,прызнанне незалежных медыяпрадуктаў экстрэмісцкімі матэрыяламі, аказваецца ціск на палітвязняў. Адбываюцца рэпрэсіі ў дачыненні да беларусаў, якія актыўна выказваюць сваю грамадзянскую пазіцыю ў адносінах да вайны, распачатай узброенымі сіламі Расійскай Федэрацыі. Праваабарончы цэнтр «Вясна» збірае апошнія факты палітычнага пераследу.
|
Калі вас ці вашых блізкіх затрымалі, паведамляйце нам:
|
Ціск на палітзняволеных
- Палітвязень Раман Багнавец
Адміністрацыя наваполацкай калоніі цісне на палітвязня Рамана Багнаўца, які адбывае тэрмін у наваполацкай калоніі. Пра гэта паведаміла яго сястра. Яна распавяла, што больш за месяц не атрымлівала ад брата аніякіх звестах. І толькі некалькі дзен таму да яе дайшлі лісты ад Ромы, у якіх ён паведаміў, што ажно два тыдні яго ўтрымлівалі ў ШІЗА, і што ў хуткім часе яго могуць перавесці ў ПКТ (памяшканне камернага тыпу). Акрамя гэтага, ён паведмляе, што адносіны адміністрацыі калоніі №1 да зняволеных апошнім часам вельмі пагоршыліся. Па словах Рамана, там «робяць усё дзеля таго, каб было сорамна за тое, што яны палітвязні».
Нагадаем, Рамана Багнаўца абвінавацілі ва ўдзеле ў масавых беспарадках у Пінску ў ноч з 9 на 10 жніўня (арт. 293 КК). Яго асудзілі па «пінскай справе» да 6 гадоў калоніі ўзмоцненага рэжыму.
| Падтрымаць Рамана можна лістамі салідарнасці і паштоўкамі. Адрас такі: ПК №1, 211440, г. Наваполацк, вул. Тэхнічная, 8. Раману Анатольевічу Багнаўцу. |
- Палітвязень Аляксандр Нурдзінаў
Палітзняволенага Аляксандра Нурдзінава перавялі ў крытую турму на два гады.
Нагадаем, Аляксандра асудзілі да 4 гадоў калоніі ўзмоцненага рэжыму па двух артыкулах Крымінальнага кодэкса: ч.1 арт. 342 і ч.2 арт. 293. Абвінавацілі ва ўдзеле ў пратэсных акцыях 9-10 жніўня 2020 года, блакаванні дарог, узвядзенні барыкад і ў тым, што «кідаў расліннасць з кветнікаў у супрацоўнікаў органаў унутраных спраў».
| Вы можаце падтрымаць палітвязня і даслаць яму ліст. Адрас такі: Турма №1, 230023, г. Гродна, вул. Кірава, 1. Аляксандру Андрэевічу Нурдзінаву. |
- Палітзняволены Уладзімір Колас
Палітвязню Уладзіміру Коласу ўзмацнілі рэжым і перавялі з «хіміі» ў магілёўскую турму. Прычына - «парушэнне правілаў унутранага распарадку ва ўстанове». Цяпер ён будзе адбываць тэрмін у магілёўскай турме №4.
Уладзіміра асудзілі на 1 год і 6 месяцаў абмежавання волі з накіраваннем у папраўчую ўстанову адкрытага тыпу за абразу Лукашэнкі (арт. 368 КК). Трэцяга красавіка 2021 Коласа затрымалі, змясцілі ў ІЧУ, а затым этапавалі да месца адбыцця пакарання. З 14 красавіка палітвязень знаходзіўся ў папраўчай установе №46.
| Падтрымайце Уладзіміра лістамі салідарнасці. Адрас такі: турма №4, 212011, г. Магілёў, вул. Крупскай, 99А, Уладзіміру Сяргеевічу Коласу. |
Таксама праваабаронцам «Вясны» стала вядома, што апошнім часам у гродзенскай турме некаторым сваякам палітвязняў адмаўляюць у перадачах і спатканнях. Вяьзням нельга перадаць нават кнігі. З чым звязана такое абмежаванне, пакуль невядома. Адміністрацыя турмы адказвае толькі адно: «Не положено!».
- Мікіта Залатароў
Праваабаронцам паведамілі, што адміністрацыя выхаваўчай калоніі №2 цісне на 17-гадовага палітвязня Мікіту Залатарова, якога ўжо двойчы асудзілі па «пратэсных» артыкулах. Паведамляюць, што яго рэгулярна караюць суткамі ў штрафным ізалятары.
Мікіта Залатароў - падлетак хворы на эпілепсію. У лютым 2021 года хлопцу прысудзілі 5 гадоў у выхаваўчай калоніі па крымінальнай справе аб «кактэйлях Молатава». Ён неаднаразова скардзіўся бацьку на жорсткае збіццё - ужывалі нават электрашокер. Ужо ў ліпені 2021 года хлопца зноў асудзілі. Яго абвінавацілі ў нападзе на супрацоўніка СІЗА-3 па арт. 364 КК. Шляхам частковага складання раней прысуджанага тэрміну пакарання з новым, агульны тэрмін пакарання для Мікіты склаў 4,5 гады пазбаўлення волі ў выхаваўчай калоніі.
| Падтрымайце Мікіту лістамі салідарнасці. Адрас такі: Выхаваўчая калонія №2, 213807, г. Бабруйск, вул. Генерала Батава, 4, Мікіту Міхайлавічу Залатарову |
Папаўненне ў спісе экстрэмістаў
- Кнігу прызналі экстрэмісцкай
Стала вядома, што суд Ленінскага раёна Гродна вынес рашэнне аб прызнанні кнігі «Ваенная гісторыя Беларусі. Героі. Сімвалы. Колеры», якая выйшла ў сталічным выдавецтве «Харвест» у 2019 годзе, экстрэмісцкай. Яна ўключана ў адпаведны спіс, размешчаны на сайце Міністэрства інфармацыі. Аўтар гэтай кнігі - Віктар Ляхар. Ён вядомы беларускі геральдыст, член Міжнароднага саюза дызайнераў, які шмат гадоў уваходзіў у склад Геральдычнай рады пры прэзідэнце. Дарэчы, гэта ён распрацаваў сімволіку для многіх дзяржорганаў, у тым ліку сілавых. Так, менавіта яму належыць аўтарства эмблем большасці структур МУС, якія ён распрацаваў яшчэ ў нулявыя гады, у тым ліку эмблемы ДАІ, АМАП, ГУБАЗіК і Дэпартамента аховы.
Новыя затрыманні
- Фота з затрымання Арсенія Пахомава
Стала вядома пра затрыманне Арсенія Пахомава. «Пакаяльнае» відэа з ім з’явілася на праўладным тэлеграм-канале.
На ім мужчына кажа, што яму 35 год, ён часова беспрацоўны, і што затрымалі яго за тое, што ён «распаўсюджваў дэструкрыўную інфармацыю пра вайну ва Украіне».
ГУБАЗіК таксама паведаміў, што па начах затрыманы нібыта расклейваў налепкі з забароненымі выявамі. У якасці доказу віны Арсенія сілавікі размясцілі ў тэлеграм-канале фотаздымкі з кватэры затрыманага. На іх сцяг Украіны, бел-чырвона-белыя значкі і стужачкі, значкі з надпісамі «Белсат», «Выбары 2006. Назіральнік», сцяг ЗША, сцяг Арганізацыі ўкраінскіх нацыяналістаў, налепкі з надпісам «Не смяротнаму пакаранню», «Баста», пасведчанне (напэўна, ужо несапраўднае) супрацоўніка «Нашай Нівы» і туалетная папера з партрэтам-шаржам Пуціна. Дзе зараз утрымліваюць Арсенія, пакуль невядома.
- Васіль і Ала Раманенкі
Праваабаронцы даведаліся пра затрыманне ў Мінску ўладальнікаў агенцтва нерухомасці КУБ - мужа і жонкі Васіля Раманенкі і Алы Раманенкі. Учора, 20 красавіка, дадому да іх уварваліся супрацоўнікі ГУБАЗ і САХР.
Вядома, што дома ў мужа і жонкі правялі агляд, канфіскавалі жорсткі дыск.
Па дадзеных, якімі валодаюць сваякі Алы і Васіля, ноч пасля затрымання яны правялі на Акрэсціна. Ёсць звесткі, што сёння, 21 красавіка, над імі павінен адбыцца суд.
- Актывіст прафсаюза РЭП Вацлаў Арэшка
Стала вядома, што актывіст прафсаюза РЭП Вацлаў Арэшка знаходзіцца ў СІЗА КДБ. Нагадаем, 19 красавіка з’явілася інфармацыя пра ператрусы ў офісах і кватэрах лідэраў незалежных беларускіх прафсаюзаў, затрыманні кіраўнікоў і актывістаў прафсаюзнага руху.
Наступ на незалежны прафсаюзны рух: што вядома па стане на 21 красавіка
Праваабаронцы даведаліся, што ў Баранавічах затрымалі Юрыя Вераб'ева. У чым яго абвінавачваюць і дзе зараз утрымліваюць, пакуль невядома.
- Лізавета Мярляк
У Гродне затрымалі сяброўку БСДП, міжнародную сакратарку Беларускага незалежнага прафсаюза Лізавету Мярляк.
- Гэтага мужчыну затрымалі ў яго ж Дзень народзінаў
У Мазыры затрымалі мужчыну, якога завуць Уладзіслаў. Яго прозвішча праваабаронцы пакуль не ведаюць. На праўладным тэлеграм-канале ГУБАЗ размясціў відэа, на якім бачна, што мужчыну затрымалі ў яго дома. Сілавікі ўрываюцца ў кватэру, кідаюць мужчыну тварам у падлогу, заломваюць рукі за спінай, пытаюцца яго імя, а калі той адказвае, цынічна кажуць: «С Днем рождения, Владислав». Далей запісваць відэа працягваюць ужо ў машыне.
Затрыманы мужчына ў відавочна прыгнечаным стане гаворыць, што ён 1977-га года нараджэння, жыве ў Мазыры, прызнаецца, што абразіў у каментарах супрацоўніка ГУБАЗ, раскайваецца і выбачаецца за свой учынак. Таксама мужчына сазнаецца, што «распаўсюджваў малюнкі, якія абражаюць прэзідэнта і супрацоўнікаў міліцыі». Напрыканцы відэа затрыманы пацвярджае, што ён сапраўды затрыманы ў свой Дзень народзінаў. Меркавана, гэта адбылося 20 красавіка. Менавіта гэтым днём датавана відэа, якое з Уладзіславам запісаў ГУБАЗ.
Паведамляецца, што мужчыну прад'явілі абвінавачванне па крымінальным артыкуле 369 «Абраза прадстаўніка ўлады».
- Затрыманы чыгуначнік
Затрыманы 39-гадовы інжынер Мінскай дыстанцыі арганізацыі сувязі БЧ. З мужчынам ГУБАЗ запісаў «пакаяльнае» відэа, на якім ён гаворыць, што ў 2020-м годзе «браў удзел у несанкцыянаваных мерапрыемствах, а да нядаўняга часу быў падпісаны на экстрэмісцкія тэлеграм-каналы, з якіх рабіў рэпосты». Нібыта, за гэта мужчыну і затрымалі. Яго імя і прозвішча на відэа не прагучалі.
ГУБАЗ паведамляе, што фотаздымкі з пратэстных маршаў чыгуначнік са свайго тэлефона выдаліў, але пасля затрымання сілавікі іх аднавілі. Таксама яны нібыта вылічылі, што нядаўна ў экстрэмісцкіх тэлеграм-каналах мужчына цікавіўся відэаролікамі пра тое, як сапсаваць чыгуначнае абсталяванне. На затрыманага завялі крымінальную справу па арт. 342 «Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх». Дзе зараз знаходзіцца мужчына, праваабаронцы пакуль не ведаюць.
Кваліфікацыйная камісія Мінюста не атэставала адвакатку Марыю Колесаву-Гудзіліну. Яна абараняла палітзняволеных Эдуарда Пальчыса і Яўгена Юшкевіча.
