Палітзняволеную са Жлобіна пакаралі калоніяй за ўдзел у акцыі пратэсту ў жніўні 2020 года
Людміла Кірыленка. Скрыншот з відэа
У судзе Жлобінскага раёна 22 красавіка вынесены прысуд прадпрымальніцы з Рагачова Людміле Кірыленка, якую абвінавацілі ў арганізацыі і падрыхтоўцы дзеянняў, якія груба парушаюць грамадскі парадак (ч.1 арт. 342 Крымінальнага кодэкса).
Справу разглядаў суддзя Яўген Ерафееў.
35-гадовая Людміла Кірыленка, родам са Жлобіна, трапіла ў відэазапіс пратэснай акцыі 9 жніўня 2020 г. У траўні 2021 г. яе апыталі па гэтым факце, а таксама вынялі тэлефон і сукенку, у якой яна была падчас акцыі. Людміла не адмаўляла, што прысутнічала сярод людзей з-за цікавасці, але ніякіх актыўных дзеянняў не рабіла.
І толькі 19 студзеня 2022 года ў прадпрымальніцы прайшоў ператрус у доме па месцы жыхарства. Людмілу затрымалі і даставілі ў Жлобінскі раённы аддзел Следчага камітэта на допыт. Пасля допыту Людмілу змясцілі ў ізалятар часовага ўтрымання Жлобінскага РАУС, а затым этапавалі ў Гомель у СІЗА № 3.
У сям’і Людмілы 2 дзяцей. Паводле стану здароўя жанчыне патрабуецца складанае лячэнне. Але яе хадайніцтва аб змяненні следчага арышту на падпіску аб нявыездзе не задаволілі, паведамляе “Гомельская Вясна”.
1 лютага праваабаронцы прызналі Людмілу Кірыленка палітычнай зняволенай.
Суд пастанавіў пакараць жанчыну пазбаўленнем волі ў калоніі агульнага рэжыму тэрмінам на паўтара года.
