Затрыманні і ціск: хроніка пераследу 12 траўня Дапоўнена
У Беларусі па-ранейшаму працягваюцца затрыманні, ператрусы, катаванні ў ізалятарах, аказваецца ціск на палітвязняў, а таксама прызнанне незалежных медыяпрадуктаў экстрэмісцкімі матэрыяламі. Праваабарончы цэнтр «Вясна» збірае апошнія факты палітычнага пераследу 12 траўня.
|
Калі вас ці вашых блізкіх затрымалі, паведамляйце нам:
|
Затрымалі фармацэўта, які зняў на відэа пратэст працоўных у Маладзечне
Работнікі маладзечанскага малочнага камбіната 11 траўня выйшлі на прахадную са скаргамі на малыя заробкі. У сваім інстаграме гэты сход асвятляў мясцовы фармацэўт Расціслаў Чапурны. Як стала вядома "Наша Ніва", у той жа вечар Чапурнога схапілі сілавікі.
«Яго затрымалі ў той жа вечар, калі ён здымаў работнікаў малочнага камбіната. Як і дзе яго схапілі, я не ведаю. Але ў той жа вечар прыйшлі па яго жонку, сказалі: «Прайдзёмце». Яна пацікавілася, дзе Расціслаў, адказ быў: а Расціслаў ужо ў нас, — расказаў «Нашай Ніве» сябар блогера. — Пасля ў іх дома быў ператрус, забралі мабільнікі, камп’ютарную тэхніку».
Дакладна лёс блогера невядомы. Яго сябар кажа, што Чапурному ўжо прысудзілі 10 сутак.
У рэдакцыі Intex-press адбыўся ператрус
Гэта звязана са справай затрыманага палітзняволенага журналіста Юрыя Ганцарэвіча, якому было прад'яўлена абвінавачанне па ч.1 артыкула 361-4 КК Беларусі (садзейнічанне экстрэмісцкай дзейнасці). Журналіста затрымалі за тое, што ён нібыта сфатаграфаваў расійскую ваенную тэхніку і даслаў здымкі ў СМІ, прызнаныя беларускімі ўладамі экстрэмісцкімі.
У выніку ператрусу была канфіскаваная фотатэхніка, з дапамогай якой, як пазначана ў пастанове на ператрус, былі зроблены здымкі ваеннай тэхнікі на аэрадроме ў Баранавічах.
Параілі радавацца, што не кранулі родных. У Мінску затрымалі і збілі брата палітвязня, які 11 гадоў жыве ў Польшчы
Як паведамляюць магілёўскія праваабаронцы,11 траўня ў Мінску быў затрыманы былы палітвязень Арцём Дубскі — брат палітзняволенага Іллі Дубскага, асуджанага да 5 гадоў калоніі ўзмоцненага рэжыму. Сам Арцём з 2011 года жыве ў Польшчы, а цяпер у Беларусь прыехаў наведаць сваякоў.
Мужчына разам са сваёй маці, сястрой і двума пляменніцамі выходзіў з «Гандлёвага дома на Нямізе», калі да яго падбегла 6 супрацоўнікаў у масках. У Арцёма вырвалі з рук тэлефон, затым павалілі на зямлю і збілі, пасля чаго надзелі кайданкі і закінулі ў свой аўтамабіль. Дубскага адвезлі ў будынак КДБ на Камсамольскай.
Там у Арцёма пыталіся, ці завербаваны ён польскімі спецслужбамі, колькі гадоў ужо пражывае ў Польшчы, ці праходзіў ён ваенную падрыхтоўку, ці адносіцца да апазіцыйных структур.
Пасля допыту, які доўжыўся да 1:20, Дубскаму прапанавалі застацца на "службовай кватэры" на ноч, каб 12 траўня ён зноў з'явіўся ў КДБ і даў пісьмовыя тлумачэнні, а таксама прайшоў паліграф.
Калі Дубскі адмовіўся, супрацоўнікі на відэакамеру зачыталі мужчыну позву аб неабходнасці яўкі ў якасці асобы, у дачыненні да якой праводзяцца аператыўна-вышуковыя мерапрыемствы. Паўторна з'явіцца ў КДБ яму неабходна было да 14:30 12 траўня.
На заўвагу Дубскага, што пры затрыманні яго можна было і не збіваць, чэкісты параілі радавацца, што не кранулі ягоных родных, якія былі ў той момант побач з ім.
Па дарозе з Мінска ў Асіповічы, дзе жыве зараз Дубскі, яго аўтамабіль пераследваў чорны Volkswagen Jetta. Падчас аднаго з прыпынкаў Арцём падышоў да аўтамабіля і спытаў, у чым справа, на што яму адказалі, што гэта робіцца дзеля яго ж бяспекі. Дадзены аўтамабіль з трыма сілавікамі ўнутры прастаяў каля дома Дубскага ўсю ноч.
Дубскі таксама адзначыў, што пасля збіцця яму моцна баляць рэбры і ныюць ныркі. Асобна мужчына заявіў, што ніякіх супрацьпраўных дзеянняў ён не здзяйсняў і мае намер сёння з'явіцца ў КДБ.
Позна ўвечары магілёўскія праваабаронцы ўдакладнілі, што Арцём Дубскі перастаў выходзіць на сувязь. Прыкладна а 12 гадзіне дня, 12 траўня, ён напісаў, што едзе ў Мінск на допыт і больш на сувязь не выходзіў. Праваабаронцы мяркуюць, што Арцём затрыманы. Падрабязнасці ўдакладняюцца.
*Арцём Дубскі — былы палітвязень і актывіст "Маладога Фронту", былы ўдзельнік "працэсу 14-ці".
Палата прадстаўнікоў Беларусі падтрымала праект аб завочным крымінальным пераследзе і судах
Ён будзе распаўсюджвацца на справы па артыкулах аб злачынствах:
- супраць міру і бяспекі чалавецтва;
- супраць дзяржавы;
- шэрагу іншых злачынстваў, якія прыводзяць да пагрозы нацыянальнай бяспецы.
Праектам прадугледжана, што вядзенне крымінальнай справы магчыма, калі абвінавачаны ўхіляецца ад яўкі ў вядучы расследаванне орган, у яго выдачы адмоўлена, або на працягу шасці месяцаў не атрыманы адказ на запыт аб выдачы.
Таксама прадугледжваецца правядзенне спецыяльнай вытворчасці без запыту аб выдачы: пастанову на гэта можа выдаць Генпракурор, альбо старшыня СК, КДБ са згоды Генпракурора.
У Брэсце хлопец выйшаў з антываенным плакатам да расійскага консульства — яму прызначылі 10 сутак арышту
Брэсцкай "Вясне" стала вядома, што месяц таму, 10 красавіка, жыхар Брэста Павел Барсук выйшаў з антываенным плакатам да мясцовага будынка Генконсульства Расіі. Час для пікету ён абраў такі, каб вакол абавязкова былі мінакі: каля 18.30.
Амаль імгненна Паўла затрымалі. Змясцілі ў ІЧУ, склалі пратакол па ч.1 арт.24.23 КаАП (Парушэнне парадку арганізацыі або правядзення масавых мерапрыемстваў).
На судзе 12 красавіка Павел адзначыў, што выйшаў з плакатам да консульства наўмысна, бо хацеў выказаць сваю нязгоду з уварваннем Расіі ва Украіну. За такое выказванне грамадзянскай пазіцыі Ленінскі суд Брэста ў асобе суддзі Святаслава Каліны прызначыў Барсуку 10 сутак арышту.
Палітзняволенага журналіста «Радыё Свабоды» Андрэя Кузнечыка перавялі ў магілёўскую турму
З чым звязаны перавод, невядома. Акрамя гэтага, ні калегі, ні родныя дагэтуль не ведаюць, па якім артыкуле абвінавачваюць затрыманага ў лістападзе журналіста. Адвакат знаходзіцца пад падпіскай аб неразгалошванні.
Андрэя затрымалі 25 лістапада 2021 года. У ягонай кватэры адбыўся ператрус. Адразу яго двойчы асудзілі па адміністрацыйных справах, а 23 снежня сваякам журналіста паведамілі, што на яго завялі крымінальную справу.
Падтрымайце Андрэя: Турма №4, 212011, Магілёў, Крупскай, 99А, Андрэй Аляксеевіч Кузнечык
СК Беларусі: Польшча адмовіла Беларусі ў выдачы Сцяпана Пуцілы, а Літва адмовіла ў выдачы Святланы Ціханоўскай
Аб гэтым заявіў старшыня Следчага камітэта Дзмітрый Гора.
Інфармацыя дапаўняецца.
