За наезд на супрацоўніка міліцыі ў жніўні 2020 года жыхара Баранавіч асудзілі да калоніі
Павел Лінкевіч
У судзе Баранавічскага раёна і Баранавіч 11 ліпеня вынесены прысуд па крымінальнай справе Паўла Лінкевіча, абвінавачанага ў наўмысным прычыненні цяжкага цялеснага пашкоджання супрацоўніку міліцыі (ч. 2 арт. 147 Крымінальнага кодэкса).
Судовы працэс вёў суддзя Мікалай Кміта.
Па матэрыялах следства, у жніўні 2020 года ў Баранавічах 35-гадовы мужчына, седзячы за рулём пазадарожніка, здзейсніў наўмысны наезд на супрацоўніка органаў унутраных спраў, які ажыццяўляў ахову грамадскага парадку. У выніку супрацоўніку былі прычыненыя цяжкія цялесныя пашкоджанні, з якімі яго шпіталізавалі ў бальніцу.
Супрацоўнікі ДАІ пераследвалі абвінавачанага, аднак кіроўца кінуў свой аўтамабіль паблізу вёскі Антанова, а сам схаваўся.
Мужчына быў абвешчаны ў вышук і пасля вяртання з Польшчы 5 траўня 2022 года ў Баранавічы ён быў затрыманы і змешчаны пад варту.
Судовы працэс пачаўся 6 ліпеня.
Прадстаўнік абвінавачання запрасіў для Лінкевіча пазбаўлення волі тэрмінам на 7 гадоў і 10 000 рублёў матэрыяльнай кампенсацыі пацярпеламу супрацоўніку міліцыі.
Акрамя таго ў суд накіравалі пазоў у грамадзянскі суд аб прызнанні аўтамабіля Лінкевіча сродкам здзяйснення злачынства, каб потым прымяніць да яго спецыяльную канфіскацыю. Праўда, аўтамабіль стаіць на расійскім уліку.
Паўла Лінкевіча прызналі вінаватым і асудзілі да 7 гадоў пазбаўлення волі ў калоніі ўзмоцненага рэжыму.
У Баранавічах пачаўся суд за наезд на супрацоўніка міліцыі ў жніўні 2020 года
