Зняважаны даішнік Вольніч: тры чэрвеньскія справы спынілі, а адну — не
"Вясне" сталі вядомыя рашэнні яшчэ па чатырох крымінальных справах паводле абвінавачвання ў абразе ганцавіцкага інспектара ДАІ Ігара Вольніча. Судовыя працэсы праходзілі сёлета з 23 па 28 чэрвеня. У трох з гэтых спраў абвінавачаныя былі вызваленыя ад адказнасці праз заканчэнне тэрмінаў даўнасці.
- Ігар Вольніч затрымлівае ўдзельніка акцыі
20 чэрвеня 2020 года на цэнтральнай плошчы горада Ганцавічы адбылася мірная акцыя "Ланцуг салідарнасці". Інспектар ДАІ Ігар Вольніч, які прыбыў туды, праславіўся брутальным затрыманнем: ён прыціснуў галаву аднаго з удзельнікаў акцыі каленам да асфальта.
Сам жа Вольніч мяркуе, што ў той дзень прыбыў на плошчу дзеля "забеспячэння бяспекі дарожнага руху", бо там праходзіў "несанкцыянаваны мітынг". Ён "браў удзел у затрыманні асобы, якая знаходзілася ў стане алкагольнага ап'янення і не выконвала патрабаванні начальніка Ганцавіцкага РАУС".
Менавіта такія паказанні Вольніч у якасці пацярпелага агучыў падчас судовага працэсу над Надзеяй Дуванавай. Яе абвінавацілі ў абразе Вольніча (арт. 369 КК "Абраза прадстаўніка ўлады") — жанчына пакінула каментар у сацыяльнай сетцы "ВКонтакте" пад допісам пра ягоныя дзеянні.
Судовы працэс над жанчынай праходзіў 26 чэрвеня ў судзе Ганцавіцкага раёна. Сваю віну Дуванава прызнала. Суддзя Уладзімір Космач асудзіў яе да абмежавання волі без накіравання ў папраўчую ўстанову адкрытага тыпу (так званай "хатняй хіміі") тэрмінам на адзін год і шэсць месяцаў. Таксама Дуванава павінна выплаціць Вольнічу кампенсацыю ягоных маральных пакут у памеры 1 500 беларускіх рублёў.
Аднак тры справы за "знявагу" Вольніча так і не скончыліся прысудам. Пра гэта распавяла "Берасцейская Вясна".
Так, сёлета 23 чэрвеня ў судзе Лунінецкага раёна распачаўся судовы працэс паводле крымінальнай справы ў дачыненні да Мікалая Сікорскага. Згодна з абвінавачваннем, Мікалай напісаў свой каментар пра Вольніча 21 чэрвеня 2020 года. А 30 чэрвеня 2022 года суддзя Аксана Зоткіна пастанавіла: справу ў дачыненні да Сікорскага спыніць праз сканчэнне тэрміна даўнасці (2 гады).
У той жа дзень, 23 чэрвеня, у судзе Ганцавіцкага раёна распачаўся працэс над Дзмітрыем Вагіным — свой каментар пра Вольніча ён напісаў, паводле абвінавачвання, 22 чэрвеня 2020 года. Суддзя Уладзімір Космач вырашыў спыніць справу, аднак пастанавіў канфіскаваць тэлефон, з якога Вагін пісаў каментар, у даход дзяржавы.
А 28 чэрвеня, таксама ў Лунінецкім судзе, праходзіў працэс над Сяргеем Тарасавым. У адпаведнасці з абвінавачваннем, ён пакінуў каментар пра Вольніча 22 чэрвеня 2020 года. Суддзя Зоткіна пастанавіла спыніць справу праз заканчэнне тэрміна даўнасці.
Мінуў тэрмін даўнасці. Падборка крымінальных спраў за "абразы", дзе абвінавачаных так і не асудзілі
