2 гады калоніі — чарговы прысуд за "садзейнічанне экстрэмісцкай дзейнасці" Дапоўнена
Гомельскі абласны суд
У Гомельскім абласным судзе 28 кастрычніка да двух гадоў калоніі асудзілі Уладзіслава Войну. Яго прызналі вінаватым ў "садзейнічанні экстрэмісцкай дзейнасці" паводле ч. 1 арт. 361-4 Крымінальнага кодэкса. Справу разглядаў суддзя Алег Харошка.
Інфармацыі пра абвінавачанага і гэтую крымінальную справу няма. Па дадзеных праваабаронцаў "Вясны", гэта ўжо 19-ты прысуд па арт. 361-4 Крымінальнага кодэкса за "садзейнічанні экстрэмісцкай дзейнасці". Большасць крымінальных справаў па гэтым артыкуле былі ўзбуджаныя пасля пачатку поўнамаштабнай вайны ва Украіне 24 лютага 2022 года ў сувязі з перадачай інфармацыі (фота, відэа) ў беларускія тэлеграм-каналы аб расійскай ваеннай тэхніцы на тэрыторыі Беларусі. Як паведаміла "Гомельская праўда", за фатаграфіі расейскай тэхнікі толькі ў Гомельскай вобласці асудзілі 12 чалавек за гэты год. Жыхароў вобласці, якія перадавалі фатаграфіі і відэа і інфармацыю аб перамяшчэнні расейскай ваеннай тэхнікі, асудзілі на тэрміны ад 2 да 4,5 гадоў калоніі.
Дапоўнена. Праваабаронцам стала вядома, што Уладзіслаў — жыхар Жлобіна, нарадзіўся ў Бабруйску. Яго асудзілі за відэа самалётаў у Жлобіне. На судзе казаў, што "быў напалоханы і падумаў, што пачалася і тут вайна".
Падтрымайце вязня: СІЗА-3, 246003, Гомель, Кніжная, 1А, Уладзіслаў Ігаравіч Война
"Вясна" збірае інфармацыю з "палітычных" судовых пасяджэнняў, якія адбываюцца па ўсёй краіне. Калі ласка, дасылайце нам вынікі судоў, аўдыё і тэкставую інфармацыю ў Telegram: @ViasnaSOS, @spring96info і на Email: viasna@spring96.org
