Берасцейца асудзілі на тры гады калоніі за каментар пра Лукашэнку і перадачу фотаздымка бюлетэня з рэферэндума

У Брэсцкім абласным судзе 21 лістапада асудзілі Сяргея Нікіцюка паводле ч. 1 арт. 368 (Абраза Лукашэнкі) і ч. 1 арт. 361-4 (Садзейнічанне экстрэмісцкай дзейнасці). Суддзя Дзмітрый Куроўскі прызначыў Сяргею Нікіцюку тры гады пазбаўлення волі ў калоніі ва ўмовах агульнага рэжыму. Дзяржабвінавачанне прадстаўляў пракурор Аляксандр Бацюшка.

Брэсцкі абласны суд. Фота: TUT.BY

Сяргею паставілі ў віну два эпізоды.

Як паведамляе "Брэсцкая Вясна", 19 траўня 2021 года мужчына ў сацсетцы “Вконтакте” пад допісам на старонцы “Белсат TV” пакінуў каментар “Трепло” у адрас Лукашэнкі. Суд палічыў каментар публічнай абразай.

27 лютага 2022 года Сяргей, у межах акцыі “Перакрэслі рэферэндум, перакрэслі беззаконне”, даслаў у тэлеграм-бот рэдакцыі NEXTA фота бюлетэня для галасавання на рэферэндуме аб унясенні зменаў у Канстытуцыю Беларусі. Абвінавачанне кваліфікавала гэта, як садзейнічанне экстрэмісцкай дзейнасці.

Мужчына цалкам прызнаў віну і раскаяўся ў здзейсненым.

Сяргею Нікіцюку 33 гады, ён навучаўся ў Валынскім нацыянальным універсітэце імя Лесі Украінкі. Жыве ў Жабінцы Брэсцкай вобласці. Мужчына мае на ўтрыманні непаўнагадовае дзіця.