Блакіроўка Patreon і новыя затрыманні: хроніка пераследу 13-14 снежня Дапоўнена
У Беларусі па-ранейшаму працягваюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць экстрэмісцкімі матэрыяламі. Адбываюцца рэпрэсіі ў дачыненні да грамадзян, якія актыўна выказваюць сваю пазіцыю ў адносінах да вайны, распачатай узброенымі сіламі Расіі. Праваабарончы цэнтр "Вясна" 13-14 снежня збірае апошнія факты палітычнага пераследу беларусаў і беларусак – інфармацыя ўвесь час дапаўняецца.
|
Калі вас ці вашых блізкіх затрымалі, паведамляйце нам:
|
Былога галоўнага лекара санаторыя «Беларусь» Андрэя Кобеля затрымалі за шпіянаж на карысць Літвы
10 гадоў ён быў галоўным лекарам санаторыя «Беларусь» у Літве, потым на той жа пасадзе працаваў у Сочы, а пазней узначаліў аддзел РНПЦ у Мінску.
Дзяржаўныя СМІ паведамляюць, што нібыта «літоўцы абклалі яго па ўсіх правілах шантажу: пагражалі крымінальнай справай за махінацыю з зямельным участкам, крадзеж сродкаў пры рэканструкцыі санаторыя — маўляў, пазбавяць яго і членаў сям'і пасведчання на жыхарства, а сыну падкінуць у аўтамабіль наркотыкі».
Затрыманы віцебскі музыка і арт-менеджар Уладзімір Булаўскі
Падрабязнасці высвятляюцца. Гэта ўжо пятае затрыманне Уладзіміра з 2020 году.
Сілавікі затрымалі айцішніка з Брэста Паўла Петручэню — ён нібыта «зліваў» асабістыя дадзеныя супрацоўнікаў Дэпартамента аховы
У роліку СК ён кажа, што працаваў у Дэпартаменце аховы да 2018 года, затрыманы за перадачу асабістых звестак супрацоўнікаў Дэпартамента. Звесткі ён нібыта ўзяў з кнігі тэлефоннага даведніка, да якога ў яго быў доступ.
Следчы камітэт у сваім паведамленні распавёў, што Паўлу ўжо прад'яўлена абвінавачанне па ч.6арт.16 і ч.3арт.130 (дапамога ў распальванні варожасці і варажнечы, учыненая групай асоб) Крымінальнага кодэкса Рэспублікі Беларусь.
Паводле праўладных тэлеграм-каналаў, мужчыну падазраюць у перадачы дадзеных у «Чорную кнігу Беларусі».
У Віцебску 14 снежня раніцай адбыліся затрыманні
Праваабаронцам вядома, што сярод затрыманых Пятрунін, Кульман, Ларкоў — паводле папярэдняй інфармацыі, усе яны былі звязаныя з мясцовым гастрапабам ROK’I PUB.
Затрыманні ў Мінску
У Мінску затрыманыя Віктар Карагода і Анастасія Князева. Па папярэдняй інфармацыі, Віктар знаходзіцца на Акрэсціна. Прычыны затрымання пакуль невядомыя.
У Беларусі заблакавалі Patreon
Пры заходзе на сайт у карыстальнікаў унутры Беларусі з'яўляецца плашка пра тое, што доступ да рэсурсу абмежаваны Міністэрствам інфармацыі. Платформу Patreonдля збору данатаў выкарыстоўваюць абсалютна розныя людзі і ініцыятывы.
Праваабаронца Наста Лойка 13 снежня не выйшла на волю пасля чарговых 15 сутак адміністрацыйнага арышту
- Праваабаронца Наста Лойка
Інфармацыі аб яе месцазнаходжанні няма. Гэта яе чацвёртае перазатрыманне.
Нагадаем, палітзняволеная Наста Лойка была затрымана 28 кастрычніка і пазней тройчы асуджана да адміністрацыйнага арышту. На адным з судоў праваабаронца распавядала пра катаванні — супрацоўнік ГУБАЗіК ударыў яе электрашокерам, а адзін з супрацоўнікаў ЦІП вывеў яе ва ўнутраны двор і пакінуў без вопраткі на 8 гадзін.
Дапоўнена. 14 снежня, як і ў папярэднія разы, Лойку асудзілі паводле арт. 19.1 КаАП («дробнае хуліганства»). За кратамі Наста правядзе як мінімум 60 сутак — ёй чатыры разы запар прызначалі 15 сутак арышту.
Суполка ва "Укантакце" "Добрый Жлобин" прызнаная "экстрэмісцкімі матэрыяламі"
Адпаведнае рашэнне прынятае судом Жлобінскага раёну яшчэ 27 верасня, але толькі сёння яно з'явілася ў "Рэспубліканскім спісе экстрэмісцкіх матэрыялаў".
Адзначым, што на суполку падпісана больш за 25 тысяч чалавек.
У Баранавічах затрыманы мужчына — ён толькі на днях вярнуўся з Польшчы
28-гадовы Пугач Анатоль быў затрыманы 13 снежня раніцай. Вядома, што з яго тэлефону пасля гэтага сядзелі сілавікі.
За дзень да гэтага мужчына вярнуўся з Польшчы ў Беларусь на медычнае абследванне: у яго знайшлі анкалагічнае захворванне.
Затрыманы супрацоўніка «Брэстгазаапарат». Яго арыштавалі наўпрост падчас працы
34-гадовы Максім Дарковіч быў затрыманы 6 снежня. Як вядома берасцейскай "Вясне", з заводу яго выводзілі ў кайданках.
Падставай меркавана з'яўляецца нейкі інтэрнэт-каментар. Мужчыну ўжо змясцілі ў СІЗА №7.
Супраць Ціханоўскай, Сахашчыка і Азарава распачалі новую крымінальную справу — на гэты раз за стварэнне "экстрэмісцкага фармавання" "Паспалітае рушэнне"
Як паведамляе МУС, гэтая ініцыятыва "праводзіць работу па арганізацыі замахаў на тэрытарыяльную цэласнасць, суверэнітэт, асновы канстытуцыйнага ладу і грамадскую бяспеку Рэспублікі Беларусь".
У ведамстве кажуць, што "пасля падрыхтоўкі ўдзельнікі фармавання павінны вярнуцца ў Беларусь, каб сфармаваць ужо навучаную "пятую калону" для вядзення дыверсійнай, тэрарыстычнай і агентурнай працы".
Паведамляецца, што следчымі распачаты крымінальныя справы за стварэнне экстрэмісцкага фармавання або ўдзел у ім у дачыненні да Сахашчыка, Ціханоўскай, Азарава і іншых асоб — усяго па крымінальнай справе правяраецца больш за 200 чалавек.
Палітзняволенага мастака і сірату Андрэя Раптуновіча з тэмпературай этапавалі ў віцебскі СІЗА
У Мінскім гарадскім судзе вынеслі прысуд 20-гадоваму палітзняволенаму мастаку і сіраце Андрэю Раптуновічу — чатыры гады калоніі ва ўмовах агульнага рэжыму. Яго асудзілі за намер паехаць ва Украіну і далучыцца да батальёна Каліноўскага (ч. 1 арт. 13 арт. 361-3 КК), а таксама за рэгістрацыю ў плане «Перамога» (ч. 3 арт. 361-1 КК).
Суд праходзіў у закрытым рэжыме, таму падрабязнасці судовага пасяджэння і пазіцыя палітвязня па справе невядомыя. Пад вартай хлопец утрымліваецца ўжо больш за сем месяцаў.
Стала вядома, што днямі Андрэя перавялі ў СІЗА-2 да рязгляду апеляцыйнай скаргі. Падчас этапу хлопец быў хворы, з тэмпературай.
Падтрымайце палітвязня грашовымі пераводамі, пасылкамі, тэлеграмамі: СІЗА-2. 210026, г. Віцебск, вул. Гагарына, 2, Андрэй Сяргеевіч Раптуновіч
