Сёмае пасяджэнне па "справе Вясны": другая "хуткая" за тыдзень і паперы без подпісаў як доказы віны
У судзе Ленінскага раёна Мінска 16 студзеня адбылося сёмае судовае пасяджэнне па "справе Вясны". Паводле ч. 4 арт. 228 ("кантрабанда арганізаванай групай") і ч. 2 арт. 342 Крымінальнага кодэкса ("фінансаванне групавых дзеянняў, якія груба парушаюць грамадскі парадак") судзяць старшыню Праваабарончага цэнтра "Вясна" і Нобелеўскага лаўрэата Алеся Бяляцкага, ягонага намесніка Валянціна Стэфановіча і каардынатара кампаніі "Праваабаронцы за свабодныя выбары" Уладзіміра Лабковіча. У межах гэтага працэса таксама завочна судзяць праваабаронцу Дзмітрыя Салаўёва, які быў вымушаны пакінуць Беларусь праз крымінальны пераслед. Справу разглядае сумна вядомая суддзя Марына Запаснік, а дзяржаўнае абвінавачванне падтрымлівае пракурор Аляксандр Кароль. "Вясна" працягвае сачыць за працэсам над палітзняволенымі калегамі і патрабаваць іх вызвалення.
- Вясноўцы на судзе 5 студзеня
Другая "хуткая" за тыдзень
Перад пачаткам сёмага пасяджэння да Уладзя Лабковіча выклікалі "хуткую". Шэсць дзён таму ў сувязі з дрэнным самаадчуваннем да праваабаронца таксама выклікалі медыкаў у залю суда. Вядома, што Уладзь захварэў, у яго была высокая тэмпература. Але, як і папярэдні раз, медыкі сказалі, што прычын для шпіталізацыі няма, і ён у стане прысутнічаць на судовым пасяджэнні. Уладзь вельмі дрэнна выглядае на судах — вельмі бледны, сёння медыкі яго аглядалі каля 40 хвілін.
Пісьмовыя матэрыялы справы без подпісаў
Суд пачаў вывучаць пісьмовыя матэрыялы справы — 283 тома па 300 старонак. Нагадаем, на першым судовым пасяджэнні Алесь Бяляцкі заявіў, што не паспеў за месяц азнаёміцца з усімі матэрыяламі справы, а гэта больш за 70 тамоў. Праваабаронца прасіў даць яму час на азнаямленне з імі, але суддзя Запаснік заявіла, што ў яго было дастаткова часу на гэта, і цяпер няма падставы для прадастаўлення яму дадатковага часу.
16 студзеня зачытвалі дакументы (табліцы, распіскі, матэрыялы да вебінараў, дакументы аб выдачы грошай), вынятыя з флэшак Дзмітрыя Салаўёва — усе яны без подпісаў і пячатак. Таксама на судзе агучвалі дадзеныя пра рух грашовых сродак літоўскай арганізацыі Pavasaris (з пер. літоўскай — "Вясна"). Адвакаты пярэчылі гэтаму, бо ў матэрыялах справы не было адпаведных перакладаў іх на рускую ці беларускую мову, з якімі яны маглі бы азнаёміцца. Пракурор зачытвай іх на замежнай мове.
У матэрыялах справы маецца шмат дакументаў 2014 і 2015 года, якія не адносяцца да перыяду, які інкрымінуецца вясноўцам — з 2016 па 2021 год. На гэта неаднаразова звярталі ўвагу адвакаты і казаў сам Алесь Бяляцкі з першага судовага пасяджэння.
Наступнае пасяджэнне прызначана на 17 студзеня ў 10:30.
МЗС Польшчы: "Мы чакаем спынення рэпрэсій супраць грамадзянскай супольнасці"
Тым часам, МЗС Польшчы 16 студзеня заклікаў вызваліць Алеся Бяляцкага «і ўсіх іншых асоб, якія дзейнічаюць дзеля будавання дэмакратычнай, суверэннай і незалежнай Беларусі».
«Мы чакаем спынення рэпрэсій супраць грамадзянскай супольнасці і пачатку працэсу дэмакратызацыі краіны сумесна з усімі палітычнымі коламі. Суверэнная і дэмакратычная Беларусь можа зноў стаць партнёрам і адказным чальцом міжнароднай супольнасці», — цытуе словы прэс-сакратара МЗС Польшчы Лукаша Ясіны "Белсат".
Палітзняволеным праваабаронцам цяпер патрэбная наша салідарнасць! Падтрымайце іх лістамі, пасылкамі і грашовымі пераводамі: СІЗА-1, 220030, г. Мінск, вул. Валадарскага, 2, Аляксандру Віктаравічу Бяляцкаму, Валянціну Канстанцінавічу Стэфановічу, Уладзіміру Мікалаевічу Лабковічу
Храналогія суда па "справе Вясны":
У Мінску па "справе Вясны" судзяць чатырох праваабаронцаў. Дзень першы
Суд пакуль адкрыты — мы онлайн сочым за ходам судовага працэсу.
Працягваецца суд па "справе Вясны". Другі дзень
У судзе Ленінскага раёна Мінска 6 студзеня працягваецца суд "па справе Вясны".
Трэці суд па "справе Вясны": Уладзю Лабковічу выклікалі "хуткую", праваабаронцы зноў просяць зняць кайданкі з іх
У судзе Ленінскага раёна Мінска 10 студзеня працягваецца суд "па справе Вясны"
Паказанні засакрэчаных сведак і допыт мытнікаў: што адбывалася на чацвёртым і пятым пасяджэннях па "справе Вясны"
Ціск у СІЗА, аператыўная відэаздымка ў брэсцкім офісе, сведкі на паперы. Што стала вядома на шостым пасяджэнні па "справе Вясны"
"Вясна" працягвае сачыць за працэсам над палітзняволенымі калегамі і патрабаваць іх вызвалення.
Абое пераследавалі мастака Алеся Пушкіна: што вядома пра пракурора і суддзю па "справе Вясны"
Распавядаем, што вядома пра пракурора і суддзю па "справе Вясны".
