Экстрадыцыя, вышук, затрыманні: хроніка пераследу 12 красавіка Дапоўнена
У Беларусі па-ранейшаму працягваюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць экстрэмісцкімі матэрыяламі і экстрэмісцкімі фармаваннямі. Адбываюцца рэпрэсіі ў дачыненні да грамадзян, якія актыўна выказваюць сваю пазіцыю ў адносінах да вайны, распачатай узброенымі сіламі Расіі. Праваабарончы цэнтр "Вясна" 12 красавіка збірае факты палітычнага пераследу беларусаў і беларусак – інфармацыя ўвесь час дапаўняецца.
|
Калі вас ці вашых блізкіх затрымалі, паведамляйце нам:
|
У Мінску затрыманая Ірына Зімнева
Праваабаронцам стала вядома аб затрыманні дырэктаркі Цэнтра славянскіх моваў і культур "Слаўцэнтр" Ірыны Зімневай.
Цэнтр займаецца арганізацыяй курсаў польскай мовы, а таксама дае кансультацыі па атрыманні карты паляка і паступленні ў польскія ВНУ.
Ірына – маці дзвюх непаўнагадовых дзяўчат.
Сталі вядомыя падрабязнасці затрымання дырэктаркі Цэнтра славянскіх моваў і культур “Слаўцэнтр” Ірыны Зімневай
Таксама былі затрыманыя дзве яе намесніцы: іх адпусцілі пасля допыту. Падчас ператрусу ў галоўным офісе вынялі ўсе камп’ютары.
Зімневу будуць судзіць паводле арт. 17.11 КаАП (“Хуліганства”), бо знайшлі ў тэлефоне выявы ў бел-чырвона-белых колерах, а таксама малюнак з тэкстам “Перамагай зло дабром”. Справу разглядзіць суддзя Таццяна Мотыль (суд Маскоўскага раёну Мінска).
У Светлагорску затрыманы чарговы "экстрэміст"
У Светлагорску быў затрыманы мясцовы жыхар Андрэй Якушэвіч. Затрыманне адбылося ў пятніцу 7 красавіка на працы. Мяркуецца, што ў яго знайшлі «экстрэмізм» у тэлефоне. За апошні месяц у горадзе гэта паўтаралася шматразова.
Адносна грамадзяніна была аформлена справа па ч. 2 арт. 19.11 КаАП РБ – «Распаўсюджанне, выраб, захоўванне, перавозка інфармацыйнай прадукцыі, якая ўтрымлівае заклікі да экстрэмісцкай дзейнасці альбо прапагандуе такую дзейнасць».
Берасцейскага блогера Аляксандра Кабанава абвясцілі ў вышук
Гэта вынікае са старонкі ГАУС Менскай вобласці.
На тое, што блогера і экс-палітвязня абвясцілі ў вышук, звярнуў увагу ён сам у сваім Фэйсбуку.
Нагадаем, што Кабанаў цалкам адбыў пакаранне ў калоніі па палітычнай справе. Пасля вызвалення ён з'ехаў з Беларусі і працягвае сваю актывісцкую дзейнасць. Праз гэтае да яго бацькоў ужо прыходзілі з вобшукамі.
Сафія Сапега пагадзілася на экстрадыцыю ў Расею
Палітзняволеная Cафія Сапега сустрэлася з расейскім консулам і цяпер рэшту тэрміну правядзе ў Расеі. Інфармацыю пра згоду Сапегі пацвердзіў расейскім СМІ прэс-сакратар расейскай амбасады Аляксей Маскалёў.
У Беларусі Сапезе прысудзілі 6 гадоў калоніі агульнага рэжыму па двух крымінальных артыкулах, яе прызналі палітычнай зняволенай.
Палітвязня Юрыя Касцюка этапавалі ў калонію
Касцюка таемна вывезлі з Расеі, і ў Беларусі прысудзілі 4 гады за дапамогу іншым палітвязням.
Зараз палітвязня перавялі ў аршанскую калонію №8, піша @prisoners_spring96.
Касцюка абвінавацілі паводле ч. 1 арт. 361-4 КК (садзейнічанне экстрэмісцкай дзейнасці). Паводле версіі абвінавачвання, Юрый дапамагаў іншым палітвязням: папрасіў знаёмых адкрыць польскую банкаўскую картку, куды атрымліваў грошы ад BYSOL і By_help, якія пасля накіроўваў сваякам палітвязняў. Грошы на дапамогу атрымліваў ад «арганізацый, якія пазіцыянавалі сабе як праваабарончыя». Сам Юрый на судзе віну не прызнаў і адмовіўся даваць паказанні.
Падтрымайце Юрыя: ПК № 8, 211388, Віцебская вобл., г. Орша, вул. Леніна, 195А, Юрый Андрэевіч Касцюк.
"Рэгіянальная газета" трапіла ў спіс рэспубліканскіх экстрэмісцкіх матэрыялаў
Яе інфармацыйная прадукцыя прызнана экстрэмісцкай судом Партызанскага раёну Мінска, заўважыў reform.by.
Таксама Мінінфарм, у адпаведнасці з рашэннямі судоў, уключыў у рэспубліканскі спіс экстрэмісцкіх матэрыялаў:
- суполка «Вконтакте», старонку Instagram і Youtube-канал гурта «Дети Хрущёвок», а таксама яе кампазіцыі «2020», «Таракан (Дэма)», «Папицот»;
- старонку «Вконтакте» «Юзеф Пілсудский»;
- тэлеграм-канал, чат-бот, старонку ў Instagram і Yоutube-канал руху "Рух", яго эмблему.
Рэгіну Лавор забрала з дома міліцыя падчас адбывання "хатняй хіміі"
Рамесніцу Рэгіну Лавор, якую асудзілі на два гады "хатняй хіміі" за абразу прадстаўніка ўлады, увезлі з дому сілавікі для тлумачэнняў, бо яна быццам не адчыніла дзверы дома падчас праверкі 8 красавіка.
Па яе асабіста прыехаў начальнік мясцовага ізалятара. Таксама затрымліваць Рэгіну прыехаў участковы інспектар Іўеўскага РАУСа, капітан міліцыі Аляксандр Стубеда.
Нагадаем, за сакавік 2022 года да яе больш за 25 разоў прыходзілі з праверкай, чацвёрты месяц яна не можа атрымаць дазвол, каб выехаць у Ліду і набыць матэрыялы для рамесніцтва — фактычна, Рэгіна не можа працаваць. Ёй забаранілі наведваць касцёл і нават карыстацца прыбіральняй на вуліцы. На ўсе звароты ў РАУС, МУС жанчына атрымоўвае «адпіскі».
Затрымалі яшчэ аднаго супрацоўніка “Гродна-Азот”
Андрэю Алешчыку 46 гадоў. Ён гарадзенец, з жонкай яны гадуюць дзвюх дачок. Андрэй працуе машыністам на заводзе «Хімвалакно», які належыць «Гродна Азоту».
У Мінску затрымалі майстра татуіровак Іллю Акішава, які рабіў пратэсныя татуіроўкі
Сілавікі сцвярджаюць, што атрымалі спіс яго кліентаў.
Хлопцу закідваюць удзел у масавых парушэннях грамадскага парадку.
На Акрэсціна адправілі намесніка кіраўніка асацыяцыі ветэранаў спецназа "Честь" Сяргея Заслаўскага
Яго абвінавацілі паводле артыкула 19.11 КаАП (распаўсюд экстрэмісцкай прадукцыі) і арыштавалі на 15 сутак. Па звестках выдання, Заслаўскага затрымлівалі тыя самыя амапаўцы, для якіх ён вядзе семінары па сілавой падрыхтоўцы.
Прычынай хутчэй за ўсё стаў допіс у сацсетках: Заслаўскі перапосціў артыкул пра свае спартовыя дасягненні з рэсурсу, які ўлады прызналі "экстрэмісцкім".
Сяргей Заслаўскі — актывіст усіх дэкаратыўных рухаў у падтрымку Лукашэнкі. Інструктар спецпадраздзяленняў, маёр унутраных войскаў, любімчык АМАПа і г.д. — сапраўдны ябацька. І раптам усплывае на Акрэсціна «за палітыку»!
Інфармацыя дапаўняецца.
