#FreeViasna: Агляд навінаў пра зняволеных праваабаронцаў "Вясны"
Сабралі навіны пра вясноўцаў, што знаходзяцца за кратамі.
Больш за 700 дзён у зняволенні ўтрымліваюць Алеся Бяляцкага, Валянціна Стэфановіча і Уладзіміра Лабковіча
14 ліпеня 2021 года да іх і іншых вясноўцаў прыйшлі з ператрусамі. Праваабаронцаў абвінавачвалі ў "кантрабандзе" і "фінансаванні групавых дзеяннях, якія груба парушаюць грамадскі парадак".
3 сакавіка суддзя Марына Запаснік прысудзіла вясноўцам вялікія тэрміны: Уладзю — 7 гадоў калоніі, Валянціну — 9 гадоў калоніі, Алесю — 10 гадоў калоніі. Праваабаронцы не прызналі віну ні па адным артыкуле, які ставіўся ім у віну.
Уладзімір Лабковіч патэлефанаваў з калоніі родным
Пра гэта на сваёй старонцы ў Facebook напісала ягоная жонка Ніна Лабковіч:
"Праз месяц пасля этапу атрымалі званок ад Уладзя. 4 хвіліны — як адно імгненне".
Валянціна Стэфановіча накіравалі на чыстку кабеляў
У магілёўскай калоніі № 15 цяпер адбывае тэрмін Валянцін Стэфановіч. Пра гэта паведаміла крыніца "Радыё Свабода", якая кантактуе з адным з вязняў калоніі. Паводле яе, Валянціна накіравалі працаваць на ачыстку кабеляў. Сярод зняволеных гэтая праца лічыцца вельмі шкоднай і нявыгаднай, бо плацяць за яе лічаныя капейкі.
Вядомы гісторык Цімаці Снайдэр стане голасам Алеся Бяляцкага ў арт-інсталяцыі Андрэя Курэйчыка на Oslo Freedom Forum 2023
"Галасы новай Беларусі" прадстаўляюць 16 маналогаў беларускіх палітвязняў, у тым ліку Алеся Бяляцкага, Марыі Калеснікавай, Мікалая Статкевіча, Марыны Золатавай і Ігара Лосіка. На выставе гучаць галасы амерыканскіх акцёраў і вядомых выкладчыкаў Ельскага ўніверсітэта, у тым ліку вядомых амерыканскіх гісторыкаў Цімаці Снайдэра і Марсі Шор, філосафа Джэйсана Стэнлі, рэжысёра Юрыя Кардонскага і іншых.
Гэтая выстава будзе дэманстравацца ў чацвер, 15 чэрвеня, у SALT (размешчаная па адрасе Langkaia 1, 0150 Oslo) падчас Форуму Свабоды ў Осла ў 2023 годзе.
Oslo Freedom Forum 2023 — найбуйнейшы форум па правах чалавека ў свеце, які праводзіцца штогод у Осла, Нью-Ёрку і Тайбэі.
Падтрымайце лістамі і паштоўкамі салідарнасці зняволеных вясноўцаў:ПК № 9, 213410, г. Горкі, вул. Дабралюбава, 16 ПК № 15, 213105, г. Магілёў, п/а Вейна, Слаўгарадская шаша, 183 ПК № 17, 213004, г. Шклоў, вул. 1-я Заводская, 8 |
Сетка Фонда Дамоў правоў чалавека зладзіла акцыю салідарнасці з палітзняволенымі вясноўцамі
Акцыя адбылася каля мурала Алесю Бяляцкаму ў Вільні, насупраць амбасады Беларусі ў Літве.
За апошні час не было навінаў пра кіраўніка Гомельскага аддзялення "Вясны" Леаніда Судаленку, а таксама пра каардынатарку Валанцёрскай службы "Вясны" Марфу Рабкову і валанцёра Андрэя Чапюка.
Напішыце Леаніду!ПК-3. 211322, Віцебская вобласць, г.п. Віцьба Леаніду Леанідавічу Судаленку |
Дасылайце лісты ці паштоўкі салідарнасці Марфе і Андрэю:ПК № 4. 246035, г. Гомель, вул. Антошкіна, 3 ПК № 22. 225295, Брэсцкая вобласць, г. Івацэвічы, ст. Даманава, а/с 20 |
Як яшчэ падтрымаць "вясноўцаў"?
1. Лісты салідарнасці – наймацнейшая падтрымка звонку. Падпісвайце паштоўкі, пішыце лісты і дасылайце словы падтрымкі нашым калегам. Адпраўляць лісты можна праз звычайную пошту, а таксама праз электронныя сэрвісы:
Таксама прапануем дасылаць палітвязням тэлеграмы. Гэта можна зрабіць на пошце або па нумару тэлефона 166 (толькі з гарадскога) і надыктаваць тэкст. Не забывайце пакідаць сваё імя ў тэксце тэлеграмы.
2. Не менш значная падтрымка – распаўсюд інфармацыі. Мы заклікаем распавядаць пра “вясноўцаў” і іншых палітзняволеных блізкім, сябрам, калегам ды наўпрост у сацыяльных сетках. Так найбольшая колькасць людзей зможа даведацца пра гісторыі зняволеных і праявіць сваю салідарнасць з імі! Абавязкова выкарыстоўвайце хэштэг #FreeViasna.
3. Падпішыце петыцыю за вызваленне “вясноўцаў” і ўсіх палітвязняў Беларусі!
4. Падтрымаць "Вясну" на Patreon ці аднаразовым данатам.
Больш навінаў пра вясноўцаў – на сайце freeviasna.org
