Затрыманні, "экстрэмісцкія" матэрыялы: хроніка палітычнага пераследу 22 жніўня Дапоўнена

У Беларусі па-ранейшаму працягваюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць экстрэмісцкімі матэрыяламі і экстрэмісцкімі фармаваннямі. Адбываюцца рэпрэсіі ў дачыненні да грамадзян, якія актыўна выказваюць сваю пазіцыю ў адносінах да вайны, распачатай узброенымі сіламі Расіі. Праваабарончы цэнтр "Вясна" 22 жніўня збірае факты палітычнага пераследу беларусаў і беларусак – інфармацыя ўвесь час дапаўняецца.

У пастаўчаніна Дзяніса Цыбульскага за «лайкі» забралі тры тэлефоны і далі 22 сутак арышту 

Спачатку мужчыну арыштавалі на 15 сутак, затым — на 7. Абодва разы судзілі Цыбульскага за «экстрэмісцкія» матэрыялы ў «Аднакласніках». Вядома, што ў Дзяніса канфіскавалі «Xiaomi POCO X3» і «Samsung Galaxy J5».

Мужчына віну не прызнаў і заявіў на судзе, што калі «лайкаў» матэрыялы, якія яму спадабаліся, то не пераследваў мэты іх распаўсюду і не рабіў рэпосты.

Па вяртанні з Літвы затрыманы наваполацкі стаматолаг Аляксандр Грудніцкі і яго жонка

Інцыдэнт адбыўся 21 жніўня. «Яны вярталіся ад сына з Літвы, іх затрымалі на беларускай мяжы. 22 жніўня Грудніцкі мусіў выйсці на прыём пацыентаў, але гэтага не адбылося», — сказаў суразмоўца.

Прычына затрымання, статус і месцазнаходжанне лекара і яго жонкі невядомыя.

За «экстрэмізм» кіроўца-дальнабойшчык атрымаў 10 сутак арышту

Суддзя Браслаўскага раёна Аляксандр Вязіцкі 31 ліпеня прыняў рашэнне арыштаваць на 10 сутак кіроўцу-міжнародніка Дзмітрыя Жарскага, які, на думку суддзі, распаўсюджваў у сацыяльных сетках экстрэмісцкія матэрыялы. На разгляд адміністратыўнай справы Дзмітрый не з'явіўся.

Суд устанавіў, што Жарскі захоўваў з мэтай распаўсюджвання інфармацыйную прадукцыю экстрэмісцкага зместу, якая знаходзілася старонках сацыяльнай сеткі «Instagram» з назвай «NEXTA» і «Charter97.оrg».

Суддзя Вязіцкі пастанавіў арыштаваць кіроўцу-міжнародніка на дзесяць сутак і канфіскаваць у даход дзяржавы яго тэлефон, піша «Віцебская Вясна».

Стыкеры «Дзякуй» і «Грустный Коленька» — чарговае папаўненне спіса экстрэмісцкіх матэрыялаў

• Telegram-каналы «Валанцёры Офіса», «Good morning Gruchevka», «Беларускі Дом ва Украіне», «КААРДЫНУЮЧАЯ УПРАВА НАЦЫЯНАЛЬНА-ВЫЗВОЛЬНАГА РУХУ "ВОЛЬНАЯ БЕЛАРУСЬ», «Домбровка-3 — чат квартала»;
• Старонка ва «Укантакце» «Альтернатива Беларусь»;
• Сайт і сацсеткі праекту «Shakal.Today»;
• Instagram-старонка «honor-blr»;
• Тэлеграм-стыкеры «Дзякуй»;
• Сацсеткі праекту «Грустный Коленька».

У Беларусі новае «экстрэмісцкае фармаванне» — «Хватит бояться! – Татьяна Мартынова»

Пра гэта паведамляюць праўладныя тэлеграм-каналы. Паводле іх, такое рашэнне было прынятае МУС на падставе «арганізацыі дзейнасці па падрыхтоўцы здзяйснення замахаў на суверэнітэт і грамадскую бяспеку Рэспублікі Беларусь, дыскрэдытацыю і абразу службовых асоб».