Крымінальныя справы супраць Рады БНР: хроніка пераследу першага-другога кастрычніка Дапоўнена
У Беларусі па-ранейшаму працягваюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць экстрэмісцкімі матэрыяламі і экстрэмісцкімі фармаваннямі. Адбываюцца рэпрэсіі ў дачыненні да грамадзян, якія актыўна выказваюць сваю пазіцыю ў адносінах да вайны, распачатай узброенымі сіламі Расіі. Праваабарончы цэнтр "Вясна" 1-2 кастрычніка збірае факты палітычнага пераследу беларусаў і беларусак – інфармацыя ўвесь час дапаўняецца.
|
Калі вас ці вашых блізкіх затрымалі, паведамляйце нам:
|
Генпракуратура распачала крымінальныя справы супраць Рады БНР
У дачыненні да кіраўнікоў і сябраў Рады БНР распачалі крымінальныя справы:
- змова або іншыя дзеянні з мэтай захопу дзяржаўнай улады (ч.1 арт. 357 КК);
- кіраўніцтва экстрэмісцкім фармаваннем, а роўна фармаваннем, дзейнасць якога накіравана на рэабілітацыю нацызму, альбо ўдзелу ў ім (ч.1 арт. 361-1 КК);
- уцягванне ў экстрэмісцкую дзейнасць і іншае садзейнічанне такой дзейнасці, учыненае групай асоб (ч.2 арт. 361-4 КК);
- распальванне нацыянальнай, рэлігійнай або іншай сацыяльнай варожасці або варажнечы, учыненае групай асоб (ч.1 арт. 130 КК);
- наўмысныя дзеянні па рэабілітацыі нацызму, учыненыя групай асоб (ч.3 арт. 130-1);
- падбухторванне да ўдзелу грамадзян Рэспублікі Беларусь на тэрыторыі замежнай дзяржавы ва ўзброеным фармаванні аднаго з супрацьлеглых бакоў, а таксама ўдзелу ва ўзброеным канфлікце, ваенных дзеяннях без упаўнаважання дзяржавы (ч.5 арт. 16, ч.1 арт. 361-3 КК);
- дыскрэдытацыя Рэспублікі Беларусь (арт. 369-1 КК).
Затрымалі амапаўцы з шчытамі і змясцілі ў СІЗА жыхара Гомеля
Адзін з каналаў, які належыць сілавікам, “адсправаздачыўся” пра затрыманне жыхара Гомеля.
На думку сілавікоў, ён “штампаваў мноства абразлівых каментароў на адрас Прэзідэнта, супрацоўнікаў міліцыі і прадстаўнікоў улады ў розных экстрэмісцкіх памыйніцах”.
Палітзняволенага анархіста Дзмітрыя Рэзановіча змясцілі ў ПКТ
Па інфармацыі тг-канала «Права на паўстанне», палітвязня Дзмітрыя Рэзановіча перавялі ў памяшканне камернага тыпу да сакавіка. Раней паведамлялася, што Дзмітрыя неаднаразова змяшчалі ў ШІЗА, а таксама пазбавілі спатканняў і перадач і пагражалі перавесці на турэмны рэжым.
Нагадаем, Дзмітрый быў затрыманы напрыканцы кастрычніка 2020 года. 22 снежня Мінскі абласны суд прызначыў Аліневічу і Раманаву — па 20 гадоў калоніі; Рэзановічу — 19 гадоў калоніі; Дубоўскаму — 18 гадоў калоніі. Суд з першага пасяджэння адбываўся ў закрытым рэжыме.
Падтрымайце палітвязня паштоўкай альбо лістом: ПК № 22. 225295, Брэсцкая вобласць, г. Івацэвічы, ст. Даманава, а/с 20, Дзмітрый Рыгоравіч Рэзановіч.
Палітычны пераслед у Лідскім ЖКГ
28 верасня ў Дарожна-эксплуатацыйнай вытворчасці ЖКГ затрымалі каля 7 мужчын узростам 40-45 гадоў за "экстрэмісцкія" пасты і каментары ў сацсетках. Пасля затрымання нікога не адпусцілі, загад — звольніць «парушальнікаў парадку», піша @lida_grab_court.
Апошнім часам звольнілі да заканчэння кантракту 3 праграмістаў на ЖКГ, а таксама адну жанчыну.
Пачатая крымінальная справа супраць Рады БНР. Генпракуратура ў сваім паведамленні называе яе "пранацысцкім экстрэмісцкім фармаваннем".
Сілавікі затрымалі жыхара Салігорска за перапіску з прадстаўніком батальёна "Тэрор".
На відэа сілавікоў дэманструюцца скрыншоты перапіскі, затрыманы салігарчанін кажа, што паведаміў у чаце з прадстаўніком «тэрору» сваю вайсковую спецыяльнасць і тэрмін службы, піша "Медыязона".
"Пасля гэтага яны хацелі мяне завербаваць для ўдзелу ў ваенных дзеяннях», — кажа ён на відэа.
Па якім менавіта артыкуле затрыманы мужчына - не паведамляецца, аднак на відэа ён кажа, што яму «свеціць артыкул за здраду дзяржаве і за найміцтва» (артыкулы 356 і 133 КК).
Паэта з Барысава арыштавалі за сімволіку ў тэлефоне
У судзе Барысаўскага раёна 26 верасня вынесеная пастанова аб адміністрацыйным арышце на 10 сутак 70-гадовага Уладзіміра Толкача.
У ягоным тэлефоне выявілі выявы б-ч-б сімволікі і свастыкі, якія ён змясціў яшчэ ў 2021 годзе.
Cтан здароўя гомельскага палітвязня Аляксея Ільінчыка пагоршыўся
Стала вядома, што Аляксей Ільінчык змешчаны ў неўралагічнае аддзяленне рэспубліканскай бальніцы, якое знаходзіцца на тэрыторыі СІЗА № 1 г. Мінска.
Аляксей – вядомы гомельскі бард і арганізатар канцэртаў бардаўскай песні. Вясной 2022 г. ён паехаў з гастролямі ў Расію. Там у яго нечакана здарыўся інсульт. Некалькі месяцаў мужчына лекаваўся ў шпіталі, аднак стан яго заставаўся кепскім і правая частка цела была паралізаваная. Па вяртанні ў Беларусь быў затрыманы, паведамляе "Гомельская вясна".
28 сакавіка 2023 г. суддзя Гомельскага абласнога суда Хлышчанкоў Аляксей прысудзіў Ільінчыку 2,5 гады пазбаўлення волі ў калоніі ва ўмовах агульнага рэжыму. Прысуд абскарджваўся ў Вярхоўным судзе, але яго пакінулі без зменаў, пасля чаго палітвязень быў этапаваны ў ПК № 14, што ў в. Навасады Барысаўскага раёна Мінскай вобласці.
За час знаходжання ў СІЗА-3 і ў папраўчай калоніі здароўе Аляксея пагоршылася. Правая рука ў яго амаль не дзейнічае, парушаны маўленчы апарат, таму гаворыць ён з цяжкасцю. Пісаць самастойна лісты ён таксама не можа. Да таго ж, лісты яму перадаюць не спраўна, нават ад сваякоў.
Следчы камітэт распачаў новую спецвытворчасць у дачыненні да Вадзіма Пракоп'ева
Паведамляецца, што яму інкрымінаваныя:
• ч. 1 арт. 130 (распальванне варожасці);
• ч. 3 арт. 361 (заклік да мер абмежавальнага характару, іншых дзеяннях, накіраваных на прычыненне шкоды нацыянальнай бяспецы Беларусі);
• ч. 2 арт. 367 (паклёп на Лукашэнку);
• ч. 1 і ч. 2 арт. 368 (абраза Лукашэнкі);
• арт. 369 (абраза прадстаўніка ўлады).
Раней яму прызначылі 25 гадоў калоніі ва ўмовах узмоцненага рэжыму завочна, штраф у адну тысячу базавых велічынь і пазбаўленне ўсіх воінскіх званняў па "справе Гайдукевіча".
