#FreeViasna: агляд навінаў пра зняволеных праваабаронцаў "Вясны"
Сабралі навіны пра вясноўцаў, што знаходзяцца за кратамі.
Міжнародныя адвакаты Алеся Бяляцкага падалі петыцыю ў Працоўную групу ААН па адвольных затрыманнях
Міжнародная юрыдычная група лаўрэата Нобелеўскай прэміі міру, палітзняволенага праваабаронцы "Вясны" Алеся Бяляцкага падала петыцыю ў Працоўную групу ААН па адвольных затрыманнях.
Джарэд Генсэр, галоўны міжнародны адвакат Бяляцкага, які працуе на грамадскай аснове, — аўтар кнігі "Працоўная група ААН у адвольных затрыманнях: каментары і кіраўніцтва да практыкі". Каментуючы падачу петыцыі ў справе Алеся Бяляцкага Працоўнай групе, Генсэр адзначыў:
"Для мяне вялікі гонар прадстаўляць Алеся Бяляцкага, які цягам дзесяцігодздзяў нястомна змагаўся за правы чалавека, дэмакратыю і абарону грамадзянскай прасторы ў Беларусі. Яго выпадак сімвалізуе страх, які беларускі дыктатар Аляксандар Лукашэнка адчувае перад сваім народам, а таксама тое, як сістэматычна ён абезгалоўлівае кожную рэальную або ўяўную пагрозу свайму праўленню. Гэты пэрыяд тэрору паказвае баязлівасць Лукашэнкі і яго глыбокую слабасць. Ён, несумненна, баіцца свайго народу. Мы не здамося, пакуль Алесь і ўсе палітвязні не будуць вызваленыя".
"Многія з нас думаюць пра цябе, Алесь". Дэвід Ван Рейбрук напісаў Калядны ліст Бяляцкаму
- Дэвід Ван Рейбрук
Дэвід Ван Рэйбрук — бельгійскі пісьменнік, былы старшыня ПЭН-клуба Фландрыі, а цяпер пасол ПЭН-клуба Алеся Бяляцкага. Ён напісаў Бяляцкаму Калядны ліст, які быў апублікаваны на сайце арганізацыі.
"Паважаны спадар Бяляцкі,
Дарагі Алесь,Мы не знаёмыя, але пішу вам з Бруселя, дзе жыву. Мяне клічуць Дэвід Ван Рейбрук, я пісьменнік і ганаровы старшыня ПЭН-клуба Фландрыі, аднаго з двух бельгійскіх аддзяленняў Міжнароднага ПЭН-клуба.
Я б хацеў напісаць Вам на вашай роднай мове, але, на жаль, мне даводзіцца выкарыстоўваць праграму-перакладчык, каб перавесці мой ліст на рускую мову. Спадзяюся, ён не ўтрымлівае занадта шмат памылак перакладу. А калі і так, спадзяюся, яны апынуцца пацешнымі. <...>
А ці ёсць нагода для ўсмешкі ў вашым цяперашнім становішчы, Алесь? Быць Нобелеўскім лаўрэатам і палітычным зняволеным — як гэта ўвогуле магчыма? Ці можаце вы чытаць? Ці можаце вы атрымліваць пошту і адказваць на яе?
ПЭН-клуб Фландрыі нядаўна папрасіў мяне выступаць у якасці пасла па вашай справе на працягу наступных двух гадоў*. На лекцыі і выступленні я заўсёды буду браць з сабой стэнд з вашым партрэтам і імем. Незалежна ад тэмы лекцыі — ў асноўным мы будзем размаўляць пра каланіялізм, клімат і дэмакратыю – я заўсёды буду распавядаць слухачам пра вашу працу і ваш лёс. Я раблю гэта з павагі да вашай мужнасці.
Ведайце, што многія з нас думаюць пра цябе, Алесь. І ведайце, што з кожным чытаннем я намагаюся, каб група, якая думае пра вас, станавілася ўсё больш і больш. Ваш голас працягвае гучаць. <...>
Шчаслівых Калядаў і Новага года,
Дэйвід"
* Пустое крэсла — гэта канцэпцыя Міжнароднага ПЭН-клуба, якая сімвалізуе аўтара, што не можа прысутнічаць з-за турэмнага зняволення. На працягу двух гадоў (з лістапада 2023 па лістапад 2025 гг.) прадстаўнікі ПЭН-клуба Фландрыі ездзяць на выступы з пустым крэслам, каб прыцягнуць увагу да калегі, які адбывае турэмны тэрмін, у розных кропках міру.
Пад’ём а 5-й раніцы, бэтонная клетка. Адзін дзень з жыцьця зьняволенага нобэлеўскага ляўрэата Алеся Бяляцкага
Адвакатка Наталля Мацкевіч у інтэрв'ю "Жыццё-маліна" выказалася пра праваабаронцу Алеся Бяляцкага
"Алесь Бяляцкі-глыба, ён як у канцы 80-х стаў на гэтую дарогу, так і ідзе, нікуды не згортваючы, не гледзячы на рызыкі, пагрозы, ён усё гэта разумее, свядома прымае. Ён, здаецца, ведае заўсёды, што ён робіць, і за яго плячыма, фігуральна скажам — магутнымі, сфармаваўся вельмі згуртаваны, граматны праваабарончы рух. Я ўжо не кажу пра тую велізарную колькасць людзей, якім праваабаронцы дапамагалі і дапамагаюць", — сказала Наталля Мацкевіч.
Мінула 900 дзён, як у зняволенні ўтрымліваюць Алеся Бяляцкага, Валянціна Стэфановіча і Уладзіміра Лабковіча
14 ліпеня 2021 года да іх і іншых вясноўцаў прыйшлі з ператрусамі. Праваабаронцаў абвінавачвалі ў "кантрабандзе" і "фінансаванні групавых дзеяннях, якія груба парушаюць грамадскі парадак".
3 сакавіка суддзя Марына Запаснік прысудзіла вясноўцам вялікія тэрміны: Уладзю — 7 гадоў калоніі, Валянціну — 9 гадоў калоніі, Алесю — 10 гадоў калоніі. Праваабаронцы не прызналі віну ні па адным артыкуле, які ставіўся ім у віну.
У снежні палітзняволеных праваабаронцаў унеслі ў "спіс экстрэмістаў".
Падтрымайце лістамі і паштоўкамі салідарнасці зняволеных вясноўцаў:ПК № 9, 213410, г. Горкі, вул. Дабралюбава, 16 ПК № 15, 213105, г. Магілёў, п/а Вейна, Слаўгарадская шаша, 183 ПК № 17, 213004, г. Шклоў, вул. 1-я Заводская, 8 |
Мінула 1200 дзён, як за кратамі знаходзіцца Марфа Рабкова
Каардынатарка Валанцёрскай службы "Вясны" была затрымана 17 верасня 2020 года. Пазней праваабаронцу абвінавацілі па шэрагу артыкулаў Крымінальнага кодэкса за падзеі 2016-2020 гадоў і асудзілі да 15 гадоў зняволення.
Па выніках апеляцыі Марфе скарацілі тэрмін на тры месяцы. Прысуд уступіў у сілу і Рабкову этапавалі ў гомельскую калонію.
"Мы павінны справіцца". Марфа Рабкова 39 месяцаў у няволі
Адвакатка Наталля Мацкевіч у інтэрв'ю "Жыццё-маліна" распавяла пра Марфу Рабкову
"Заўсёды перажываю за Марыю Рабкову, яна далікатная і вельмі моцная адначасова, яна была маёй студэнткай, яна такая разумніца: калі на яе тэксты паглядзець, на тое, як яна кажа, наколькі глыбока яна разумее. Вельмі цяжка ёй давялося ў СІЗА і я думаю, што цяпер ёй вельмі няпроста. Але яна стойка пераносіць. Яна праваабаронца, казала, што калі б выйшла, то шмат часу прысвяціла таму, каб палепшыць становішча жанчын у зняволенні".
У Нямечынне выйшла кніга пра палітзняволеных жанчын Беларусі пад назвай "Калі вы ідзяце праз пекла, не спыняйцеся"
У выданне ўвайшлі лісты палітзняволеных праваабаронцаў Марфы Рабковай з "Вясны" і Насты Лойкі з Human Constanta. Адзін з іх — ліст Марфы да Насты, пакуль тая была яшчэ на свабодзе.
"Я буду рабіць усё, што ад мяне залежыць, адукоўваць, несці веды і абараняць правы чалавека незалежна ад межаў, часу і месца. Незалежна ад ўсіх абставінаў", — пісала Марфа з СІЗА-1.
6 студзеня каардынатарка Валанцёрскай службы "Вясны" сустрэла сваё 29-годдзе
Гэта ўжо чацвёрты Дзень народзінаў, які праваабаронца сустракае за кратамі.
Сімвалічная "хросная" павіншавала Марфу Рабкову з Днём народзінаў: "Вы натхняеце шматлікіх людзей і далёка за межамі Беларусі"
- Агнешка Бругер і Марфа Рабкова. Калаж spring96.org
Дэпутатка нямецкага Бундэстагу Агнешка Бругер, якая ў межах кампаніі #WeStandByYou з'яўляецца сімвалічнай "хроснай" праваабаронцы "Вясны", напісала Марфе пранізлівы ліст да дня народзінаў.
"Дарагая Марфа!
У ваш 29-ы Дзень нараджэння зычу вам перш за ўсё моцнага здароўя, надалей так шмат неверагоднай мужнасці, сілы, трываласці і ўсяго найлепшага. Сваёй прыхільнасцю да дэмакратыі, правоў чалавека і свабоды вы натхняеце шматлікіх людзей і далёка за межамі Беларусі.
Неймаверна жорсткае пакаранне за вашу мірную прыхільнасць да дэмакратыі і правоў чалавека ў Беларусі ўзрушыла мяне і многіх іншых дэпутатаў нямецкага Бундэстагу. Мы таксама вельмі занепакоеныя станам вашага здароўя..."
Заклікаем павіншаваць Марфу Рабкову з Днём народзінаў!ПК № 4. 246035, г. Гомель, вул. Антошкіна, 3 |
За апошні час не было ніякіх навінаў пра валанцёра Андрэя Чапюка
Дасылайце лісты ці паштоўкі салідарнасці Андрэю:
ПК № 22. 225295, Брэсцкая вобласць, г. Івацэвічы, ст. Даманава, а/с 20 |
Як яшчэ падтрымаць "вясноўцаў"?
1. Лісты салідарнасці – наймацнейшая падтрымка звонку. Падпісвайце паштоўкі, пішыце лісты і дасылайце словы падтрымкі нашым калегам. Адпраўляць лісты можна праз звычайную пошту, а таксама праз электронныя сэрвісы:
Таксама прапануем дасылаць палітвязням тэлеграмы. Гэта можна зрабіць на пошце або па нумару тэлефона 166 (толькі з гарадскога) і надыктаваць тэкст. Не забывайце пакідаць сваё імя ў тэксце тэлеграмы.
2. Не менш значная падтрымка – распаўсюд інфармацыі. Мы заклікаем распавядаць пра “вясноўцаў” і іншых палітзняволеных блізкім, сябрам, калегам ды наўпрост у сацыяльных сетках. Так найбольшая колькасць людзей зможа даведацца пра гісторыі зняволеных і праявіць сваю салідарнасць з імі! Абавязкова выкарыстоўвайце хэштэг #FreeViasna.
3. Падпішыце петыцыю за вызваленне “вясноўцаў” і ўсіх палітвязняў Беларусі!
4. Падтрымаць "Вясну" на Patreon ці аднаразовым данатам.
Больш навінаў пра вясноўцаў – на сайце freeviasna.org
