"На фотаздымках абвінавачаная апазнала сябе": у Мінску вынесены прысуд па “народным” артыкуле
Акцыя пратэсту ў Мінску 23 жніўня 2020 года
У судзе Ленінскага раёна Мінска 28 снежня быў вынесены чарговы прысуд па “народным” артыкуле: за ўдзел у пратэсным маршы ў 2020 годзе паводле ч. 1 арт. 342 Крымінальнага кодэкса судзілі барменшу Маргарыту Ермаліцкую. Справу разглядала суддзя Юлія Шчоткіна.
Маргарыту апазналі па фотаздымках, размешчаных на адным з сайтаў, і затрымалі зусім нядаўна – 7 снежня 2023 года.
Па матэрыялах абвінавачання, Маргарыта Ермаліцкая 23 жніўня 2020 года, знаходзячыся на тэрыторыі горада Мінска, далучылася да мітынгоўцаў у раёне плошчы Леніна, пасля чаго ўсе разам прайшлі па праспекце Незалежнасці да Стэлы.
У судзе Маргарыта патлумачыла, што падчас прыняцця ўдзелу ў масавым мерапрыемстве хадзіла па праезнай частцы дарогі па праспекце Незалежнасці і вуліцы Леніна, на плячах у яе было палатно бел-чырвона-белай расфарбоўкі, таксама трымала разам з іншымі ўдзельнікамі мітынгу вялікае бел-чырвона-белае палатно. Воплескі рукамі не ажыццяўляла.
На выстаўленых у судзе для агляду фотаздымках абвінавачаная апазнала сябе.
Суд прызначыў ёй пакаранне ў выглядзе абмежавання волі без накіравання ў папраўчую ўстанову адкрытага тыпу (“хатняя хімія”) на тэрмін два гады і шэсць месяцаў.
