Супрацоўніка мытні асудзілі на 2,5 гады "хатняй хіміі" за ўдзел у Маршы адзінства
У судзе Ленінскага раёна Мінска 21 снежня 2023 года асудзілі Віталя Пупіна паводле ч. 1 арт. 342 (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх) Крымінальнага кодэкса. Суддзя Марына Клімчук прызначыла супрацоўніку мытні два гады і шэсць месяцаў абмежавання волі без накіравання ў папраўчую ўстанову адкрытага тыпу ("хатняй хіміі").
- Віталь Пупін. Фота: з сацсетак Віталя
Жыхара Фаніпаля абвінавацілі ва ўдзеле ў Маршы адзінства шостага верасня 2020 года і ў выхадзе на праезную частку. Яго ўтрымлівалі пад вартай з трэцяга лістапада 2023 года. Пасля абвяшчэння прысуду мужчыну вызвалілі ў залі суда. Мужчына цалкам прызнаў віну.
Асноўнымі доказамі па справе з'яўляюцца фотаздымак з Марша, даныя мабільнага аператара аб знаходжанні абаненскага нумара і паказанні Віталя. Падчас вобшуку дома ў супрацоўніка мытні вынялі майку фіялетавага колеру, у якой яго апазналі на фотадымку з пратэсту. Пасля прысуду майку вярнулі.
Віталь скончыў Беларускі дзяржаўны эканамічны ўніверсітэт, у судовай пастанове пазначана, што на момант вынясення прысуду мужчына працуе начальнікам сектара мытнага дэкларавання ў таварыстве з дадатковай адказнасцю. Мае на ўтрыманні непоўнагадовую дачку.
