"Палку ніхто не перагінае": сілавікі абяцалі спыніць пераслед жлабінчаніна, аднак сёння яго пачынаюць судзіць
Дзмітрый Шчарбін. Фота з сацыяльных сетак.
Гомельскі абласны суд пачынае 16 лютага разгляд крымінальнай справы былога работніка жлобінскага завода БМЗ Дзмітрыя Шчарбіна, якога абвінавачваюць у распальванні сацыяльнай варожасці альбо варажнечы (ч. 1 арт. 130 КК). Справу будзе разглядаць суддзя Вадзім Бобыраў.
29-гадовага Дзмітрыя жорстка затрымалі амапаўцы ў кастрычніку 2023 года нібыта за каментарыі ў сацыяльных сетках, а 19 кастрычніка напраўладным тг-канале з'явілася "пакаяльнае відэа" з ім.
Сілавікі абвінавацілі Шчарбіна ва ўдзеле ў пратэстах у 2020 года, якія адбываліся на БМЗ. Пры гэтым паведамлялася, што Дзмітрыя не будуць працягваць пераследваць, бо "пасля адкрытай гутаркі з супрацоўнікамі праваахоўных органаў і дакладнай ацэнкі сваіх дзеянняў ён можа спакойна жыць і працаваць. Так што міліцыя выкарыстоўвае не толькі сілавыя метады, але і размовы па душах. Палку ніхто не перагінае".
Аднак, як бачна, "палку" перагнулі. Дзмітрый быў затрыманы.
Па інфармацыі Dissidentby, у Дзмітрыя трое непаўнагадовых дзяцей.
