Палітвязню Алегу Рубцу прызначылі яшчэ паўтара года зняволення
У судзе г. Жодзіна 7 сакавіка агучылі прысуд палітвязню Алегу Рубцу па новай крымінальнай справе. Яго абвінавацілі паводле ч. 2 арт. 411 Крымінальнага кодэкса (злоснае непадпарадкаванне законным патрабаванням адміністрацыі турмы). Суддзя Святлана Самусева прызнала хлопца вінаватым і прызначыла яму ў дадатак да пяці з паловай годоў зняволення яшчэ паўтара года калоніі. Раней Алега асудзілі за ўдзел у паслявыбарчых пратэстах у Пінску ў 2020 годзе (ч. 2 арт. 293 Крымінальнага кодэкса).
Алег скончыў ліцэй у Пінску і працаваў трактарыстам па адпрацоўцы. Яго затрымалі ў Пінску 10 жніўня 2020 года за ўдзел у паслявыбарчых акцыях пратэсту. Пры затрыманні хлопца моцна збілі.
Суд Маскоўскага раёна Брэста 30 красавіка 2021 годапрызначыў палітвязню пяць гадоў і шэсць месяцаў калоніі ва ўмовах узмоцненага рэжыму.
14 палітвязняў "пінскай справы" пазбавілі волі на тэрміны ад 5,5 да 6,5 гадоў
Тэрмін яго накіравалі адбываць у наваполацкую калонію № 1. Увесь час адміністрацыя ўстановы ціснула на Алега: яго шмат разоў адпраўлялі ў штрафны ізалятар, а потым перавялі ў ПКТ. У чэрвені 2022 года наваполацкая суддзя Вольга Баліка пастанавіла перавесці Алега на турэмны рэжым тэрмінам на тры гады.
Але ціск не скончыўся і ў жодзінскай турме № 8. У штрафным ізалятары за апошні год Алега ўтрымлівалі больш за 200 сутак, у тым ліку і па некалькі месяцаў запар.
Напрыканцы 2023 года стала вядома, што на палітвязня завялі новую крымінальную справу па арт. 411 КК (злоснае непадпарадкаванне законным патрабаванням адміністрацыі турмы). Справу 27 лютага 2024 года у Жодзіне пачала разглядаць суддзя Святлана Самусева. 7 сакавіка суд агучыў прысуд: дадаць да пяці з паловай годоў зняволення яшчэ паўтара года пазбаўлення волі.
Пакуль прысуд не ўступіў у сілу, Алега можна падтрымаць грашовымі пераводамі і пасылкамі: Следчая турма № 8, 222163, г. Жодзіна, вул. Савецкая, 22А, Алег Віктаравіч Рубец
