Узбуджаныя спецвытворчасці супраць актывістаў, новыя "экстрэмісцкія" матэрыялы і фармаванні: хроніка пераследу 14 сакавіка Дапоўнена
У Беларусі не спыняюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць "экстрэмісцкімі матэрыяламі і фармаваннямі". Праваабарончы цэнтр "Вясна" 14 сакавіка 2024 году збірае факты палітычнага пераследу беларусаў і беларусак – інфармацыя ўвесь час дапаўняецца.
|
Калі вас ці вашых блізкіх затрымалі, паведамляйце нам:
|
Спецвытворчасць узбуджаная супраць Ігара Казмерчака
Супраць праваабаронцы і рэдактара аршанскага незалежнага сайта Ігара Казмерчака распачалі спецвытворчасць — яго збіраюцца судзіць завочна.
Яму інкрымінаваныя:
• ч. 1 арт. 368 КК (Абраза Лукашэнкі)
• ч. 1 і ч. 2 арт. 361-4 КК (Садзейнічанне экстрэмісцкай дзейнасці)
Ігара "запрашаюць" вярнуцца ў Беларусь і прыйсці ў Аршанскі міжраённы аддзел Следчага камітэта.
ГУБАЗіК затрымаў мінчука Віталя Мурашку
Мужчыну вінавацяць ва ўдзеле ў пратэстах і напісанні каментароў у пратэсных чатах.
У тэлефоне Віталя знайшлі шэраг фота і відэа з пратэстаў, як сцвярджаюць губазікаўцы, ягонага аўтарства, піша «Наша Ніва».
Чарговая спецвытворчасць распачата упраць 62-гадовай жанчыны
Супраць 62-гадовай жанчыны з Глыбокага, якая прыдумала лозунг «Стоп таракан», распачалі спецвытворчасць — яе збіраюцца судзіць завочна.
Людміле Барэйка інкрымінуюць арт. 188 Крымінальнага кодэкса ("паклёп").
Жанчыну запрашаюць вярнуцца ў Беларусь.
Сілавікі затрымалі менчука за ўдзел у пратэстах у Мінску ў 2020 годзе
Сілавікі затрымалі мінчука за ўдзел у пратэстах у Менску ў 2020 годзе, Відэа з затрыманым апублікаваў праўладны канал "Кніга ГУ "База".
На відэа затрыманы мінчанін сядзіць перад камерай у кайданках. Ён кажа, што ўдзельнічаў у мітынгах 9, 10 і 11 жніўня 2020 года, а таксама прайшоў рэгістрацыю ў чат-боце «плана Перамога».
Аўтары канала сцвярджаюць, што гэта відэа — з тэлефона затрыманага, піша "Медыязона". Акрамя таго, мянчук кажа, што заклікаў да "радыкальных дзеянняў у дачыненні да супрацоўнікаў міліцыі".
У Лідзе шматдзетнага бацьку затрымалі за “распаўсюд экстрэмізму”
Затрыманы — 47-гадовы Сяргей Копаць. Як відаць з сацыяльных сетак, у яго ёсць жонка і ня менш за трое дзяцей.
На відэа ён кажа, што «распаўсюдзіў экстрэмісцкія матэрыялы і выяву свастыкі ў сацыяльных сетках». Таксама сілавікі пішуць, быццам Сяргей удзельнічаў у пратэстах у Лідзе ў 2020-м, але пацверджанняў гэтаму не прыводзяць.
Сілавікі сцвярджаюць, што мужчыну чакае зняволенне, піша «Наша Ніва».
Сілавікі затрымалі жыхара Магілёва
На «пакаяльным відэа» мужчына кажа, што ўдзельнічаў у акцыях пратэсту, а таксама пакідаў каментары ў Telegram.
Чарговае папаўненне Спіса экстрэмісцкіх матэрыялаў
У яго трапілі:
- Telegram-каналы, чаты і боты «Фонд Беларуской Солидарности BYSOL», «Польша от яслей до ВУЗов. Partyzanka», «Belarussische Diaspora in Ӧsterreich», «Беларуский OSINT Phoenix»;
- Youtube-канал «Menavita Online»;
- Старонкі ў «Аднакласніках» «Беларусь ЗА перемены», «Игорь Атрофименко»;
- Instagram-старонкі «Беларусь Live», «Pangenatawr», «Weeklytopfake».
- TikTok-старонкі «Iron Man», «наступ», «BYSOL», «Arseniy».
Супраць журналіста і праваабаронцы Уладзіміра Хільмановіча, а таксама актывіста Сяргея Верамеенкі распачалі спецвытворчасць
Гарадзенцаў збіраюцца судзіць завочна.
Уладзіміру Хільмановічу інкрымінуюць ч.1 і ч.2 арт. 361-4 КК (Садзейнічанне экстрэмісцкай дзейнасці). Журналіста запрашаюць вярнуцца ў Беларусь і прыйсці ва Упраўленне СК па Гродзенскай вобласці. Уладзімір ужо два з паловай гады не пражывае ў Беларусі.
54-гадоваму грамадскаму актывісту і былому ўладальнік крамы “Адметнасць” Сяргею Верамеенку інкрымінуюць ч.1 і ч.2 арт. 361-4 КК (садзейнічанне экстрэмісцкай дзейнасці).
МУС прызнала “Празрысты Магілёў” “экстрэмісцкім” фармаваннем
Па рашэнні МУС тэлеграм-канал "Празрысты Магілёў", а таксама чат канала і бот зваротнай сувязі прызнаныя "экстрэмісцкім фармаваннем", паведамляе выданне Reform.by.
У пералік "экстрэмісцкіх фармаванняў" унесены таксама лагатып канала.
На 14 сакавіка на тэлеграм-канал быў падпісаны 351 чалавек, яшчэ 156 з'яўляюцца ўдзельнікамі чата канала, піша “Медыязона”.
