Новыя затрыманні і "экстрэмісцкія" матэрыялы: хроніка пераследу 13-14 жніўня Дапоўнена
У Беларусі не спыняюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць "экстрэмісцкімі матэрыяламі і фармаваннямі". Праваабарончы цэнтр "Вясна" 13-14 жніўня 2024 году збірае факты палітычнага пераследу беларусаў і беларусак – інфармацыя ўвесь час дапаўняецца.
|
Калі вас ці вашых блізкіх затрымалі, паведамляйце нам:
|
Затрымалі яшчэ аднаго жыхара Камянца
Пра затрыманне стала вядома 14 жніўня з "пакаяльнага" відэа. У ім сцвярджаецца, што мужчына ўдзельнічаў у паслявыбарчай акцыі пратэсту ў Брэсце 10 жніўня 2020-га году.
Праўладныя тэлеграм-каналы паведамляюць, што затрыманы — сябар жыхара Камянца, якога затрымалі раней.
Беларуса затрымалі за каментары пра прадстаўнікоў улады і вайну ва Украіне
- Віталь Лазаровіч
На "пакаяльным" відэа ад 14 жніўня мужчыну прымусілі назваць свой вялікі заробак, а таксама сказаць, што ён нібыта пакідаў "негатыўныя каментары" пра прадстаўнікоў улады і іх прыхільнікаў, а таксама вайны ва Украіне і расійскіх грамадзян.
Паводле інфармацыі "Медыязоны", затрыманы — айцішнік Віталь Лазаровіч.
Кліп на верш "На Родине моей беда" беларускага паэта Аляксандра Баля прызнаны "экстрэмісцкім"
Адпаведнае рашэнне прынятае судом Ленінскага раёну Магілёва 6 жніўня.
Таксама Спіс экстрэмісцкіх матэрыялаў папоўнілі:
- Telegram-каналы і чаты «Чижовка Протестная», «Чат Шабановского округа (Рио де Шабанейро)», «Контроль автозаков Минск», «Спортивная 97%», «Охотская», «Скинхеды наше спасение. I.R.S», «Дети Рейха», «No Future»;
- Старонкі ў «Аднакласніках» «Народное посольство Беларуси в Литве», «Вольны Беларус», «Франак Вячорка»;
- TikTok-старонка «belarus_bez_lukachenko».
За ўдзел у акцыі пратэсту затрымалі жыхара Камянца
На "пакаяльным" відэа ад 14 жніўня затрыманы кажа, што прытрымліваецца левых антыфашысцкіх поглядаў і нібыта разам з сябрам прыняў удзел у паслявыбарчай акцыі пратэсту.
У Беларусі новае "экстрэмісцкае фармаванне" — праект "Пагоня Гродна" і ягоныя сацсеткі
Адпаведнае рашэнне прынятае КДБ 13 жніўня.
Паводле ведамства, дачыненне да праекту мае Дзяніс Чашчэвік.
Супраць мастачкі Віялеты Майшук распачалі спецвытворчасць — яе збіраюцца судзіць завочна
- Віялета Майшук
27-гадовай Віялеце інкрымінавана ч. 1 арт. 361-1 КК (стварэнне экстрэмісцкага фармавання або ўдзел у ім). Віялета — мастачка з Гомельшчыны, якая ў 2020 годзе праз палітычны пераслед мусіла пакінуць Беларусь.
Яе запрашаюць вярнуцца ў Беларусь і прыйсці ва Упраўленне Следчага камітэта ў Петрыкаве.
У Мінску затрымалі расійскага блогера Глебаса
На відэа ў мінскім метро блогер кажа, што "ў Мінску крыху сумнавата" і "ён хоча навесці мітусні". Пасля чаго гучна расказвае анекдот пра гамасексуалістаў і прыстае да жанчыны з пытаннем «не смешна?», паведаміла 13 жніўня "Медыязона".
На відэа з тралейбусам ён забягае ў кабіну кіроўцы і пытаецца, ці можна "паруліць".
У дачыненні да яго склалі пратакол па артыкуле аб дробным хуліганстве (артыкул 19.1 КаАП).
У Магілёве затрымалі кіроўцу
- Юрый Галачкін
У "пакаяльным" відэа ад 13 жніўня паведамілі, што мужчына ўдзельнічаў у "несанкцыянаваных масавых мерапрыемствах", а таксама прайшоў рэгістрацыю ў чат-боце "плана Перамога".
Паводле папярэдняй інфармацыі, затрыманы — Юрый Галачкін.
