КДБ супраць «Белсата»
З 10 снежня пачынае сваю дзейнасць першы недзяржаўны тэлеканал для беларусаў – “Белсат”. Гомельскае КДБ спрабуе высветліць, хто з мясцовых журналістаў збіраецца супрацоўнічаць з незалежным тэлебачаннем.
Трансляцыя спадарожнікавага тэлеканала “Белсат” на Беларусь будзе ажыццяўляцца з Варшавы. Для аб’ектыўнага асвятлення беларускіх падзей незалежнае тэлебачанне падрыхтавала сетку карэспандэнтаў ў кожным рэгіёне краіны. Менавіта ў рэгіёнах спецслужбы і пачалі вылічаць магчымых супрацоўнікаў “Белсата”. Сярод першых ахвяраў апынуўся жыхар Гомеля Сяргей Падсасонны, сябра Беларускай асацыяцыі журналістаў.
Сяргей Падсонны распавядае “Нямецкай хвалі”, што цікавіцца ягонай асобай “органы” пачалі з нядаўняга часу. Аднойчы на кватэру да журналіста завіталі міліцыянты і паведамілі, што "насупраць майго пад’езду ў двары пабілі чалавека, таму яны апытваюць сведак падзеяў. Яны папрасілі прайсці ў кухню паглядзець, куды выходзяць вокны. Потым прайшлі ў мой пакой, паглядзелі там выгляд з вокнаў".
На гэтым міліцыянты развіталіся і сышлі. А на наступны дзень да маладога чалавека зноў прыйшлі нечаканыя госці.
"Я быў дома адзін. Быў званок у дзверы і зноў сказалі, што міліцыя. Але гэта былі прадстаўнікі КДБ. Першае, што сказалі – апранайся, калі хочаш, каб усё было добра".
Сяргею ўсё гэта нагадала сітуацыю 30-х гадоў. Яго спроба патэлефанаваць была адразу ж спынена. У выпадку супраціўлення кадэбэшнікі пагражалі Сяргею абвінавачваннем ў крымінальным злачынстве.
І бізуном, і пернікам
На службовай машыне Сяргея Падсасоннага прывезлі ў будынак Гомельскай управы КДБ. У кабінеце журналіст здолеў датэлефанавацца да Беларускай асацыяцыі журналістаў.
Але калі прадстаўнікі БАЖа, у сваю чаргу, патэлефанавалі ў прэс-службу КДБ, ім адказалі, што такога чалавека не затрымлівалі.
"А мне ў гэты час сказалі, што мы вас не затрымлівалі, а вы сюды самі прыехалі дабраахвотна. А ўсім мы скажам, што вы самі сюды прыйшлі і захацелі нам распавесці пра “Белсат”.
Калі Сяргей Падсасонны адмовіўся размаўляць з чэкістамі, тыя пачалі пагражаць, што распаўсюдзяць чуткі, што журналіст з’яўляцца іх сталым супрацоўнікам. Калі і пагрозы не дапамаглі, "..яны перайшлі да прапановаў: вось ты працаваў ва універсітэце, мы дапаможам табе аднавіцца на працы – толькі з намі супрацоўнічай і распавядай пра “Белсат”.
Урэшце, без складання пратакола Сяргея Падсасоннага вызвалілі.
Чарговае парушэнне правоў
Кіраўнік гомельскай філіі БАЖа Анатоль Гатоўчыц эмацыйна ацэньвае сітуацыю, якая здарылася з сябрам ягонай арганізацыі:
"Я лічу, што дзеянні такога кшталту парушаюць усялякія існуючыя у Беларусі законы, правы чалавека".
Анатоль Гатоўчыц паведаміў, што Беларуская асацыяцыя журналістаў з нагоды інцыдэнту падрыхтавала заявы ў пракуратуру і іншыя інстанцыі.
Нагадаем, што Гомельскі рэгіён з’яўляецца лідэрам па пераследу журналістаў, падазраваных у дзейнасці на замежныя СМІ без акрэдытацыі. На дадзенай падставе ўжо тры незалежныя журналісты атрымалі ад абласной пракуратуры афіцыйныя папярэджанні.
