Лукашэнка разгледзіць пытаньне аб памілаваньні Казуліна, калі той яго папросіць

Аляксандр Лукашэнка разгледзіць пытанне аб памілаванні Аляксандра Казуліна, калі той яго аб гэтым папросіць. "Суд прыняў рашэнне. Гэта незалежная галіна ўлады. Я паважаю яго рашэнне. Адзінае, што я магу зрабіць, гэта памілаваць яго. Калі асуджаны пра гэта папросіць, я вывучу яго прашэнне і пасля скажу, ці вызваляю я яго", — заявіў А.Лукашэнка ў інтэрв'ю іспанскай газеце "Эль-Паіс".

Інтэрв'ю было запісана ў Мінску 26 лістапада і апублікавана ў выданні 2 снежня.Беларускі кіраўнік падкрэсліў, што экс-кандыдат у прэзідэнты знаходзіцца ў турме за канкрэтныя злачынствы.

- У нашым Крымінальным кодэксе няма палітычных злачынстваў, — падкрэсліў А.Лукашэнка. — Мне не важна, хто ён. Для мяне ён грамадзянін, і для суда таксама. І ўсе грамадзяне, уключаючы прэзідэнта, і тым больш кандыдата ў прэзідэнты, павінны выконваць закон. А калі нейкая асоба фарміруе банду і штурмуе турму…

Паводле слоў А.Лукашэнкі, пяць з паловай гадоў, на якія быў асуджаны А.Казулін, "не такі вялікі тэрмін".

- У нас ёсць і пажыццёвае зняволенне, і смяротнае пакаранне, — зазначыў кіраўнік дзяржавы. — Калі б ён не быў кандыдатам у прэзідэнты, ён не атрымаў бы пяць з паловай гадоў, а 10 і 12 за выбух на нашых вуліцах. Але як экс-кандыдат ён выклікаў лёгкае шкадаванне.

У 2006 годзе былы рэктар Беларускага дзяржаўнага універсітэта Аляксандр Казулін балатаваўся на пасаду прэзідэнта краіны. 25 сакавіка, праз шэсць дзён пасля галасавання, палітык быў затрыманы ў Мінску падчас масавай акцыі з нагоды гадавіны абвяшчэння Беларускай Народнай Рэспублікі. Калона накіроўвалася да спецпрыёмніка-размеркавальніка ГУУС Мінгарвыканкама на вуліцы Акрэсціна, дзе адбывалі пакаранне жыхары палатачнага гарадка на Кастрычніцкай плошчы. Падчас разгону дэманстрацыі органы правапарадку прымянілі спецсродкі.

13 ліпеня 2006 года суд прызнаў А.Казуліна вінаватым у "наўмысных дзеяннях, якія груба парушаюць грамадскі парадак, <...> суправаджаюцца прымяненнем насілля і знішчэннем чужой маёмасці", а таксама ў "арганізацыі групавых дзеянняў, якія груба парушаюць грамадскі парадак, звязаны з яўным непадпарадкаваннем законным патрабаванням прадстаўніка ўлады, пацягнулі парушэнне працы транспарту, прадпрыемстваў, і актыўным удзеле ў такіх дзеяннях". Палітыка прыгаварылі да пазбаўлення волі на пяць з паловай гадоў. Ён адбывае пакаранне ў віцебскай папраўчай калоніі агульнага рэжыму "Віцьба-3". Арганізацыя "Міжнародная амністыя" аб'явіла А.Казуліна палітзняволеным.