Новы арышт у Гомелі: 15 сутак пенсіянеру Няпомняшчаму
Карэспандэнт "Свабоды" пасьпеў паразмаўляць з Уладзімерам Няпомняшчым, калі ён зьбіраўся на суд:
“Ужо падрыхтаваў вялікі заплечнік. Паклаў надзіманы матрац, бялізну, шкарпэткі. Бяру сала, цыбулю, часнык”.
На апраўдальны прысуд Уладзімер Няпомняшчы не спадзяваўся. Увесь гэты працэс ён лічыць заказным:
“І магу патлумачыць, чаму. У маіх дзеяньнях няма ніякага крыміналу. Я, можна сказаць, ня ўдзельнічаў у чымсьці, а толькі прысутнічаў.
Так, на мне была пэўнага кшталту апазыцыйная форма, але ў руках не было нічога. На мне быў бэрэт з “Пагоняй” і бел-чырвона-белым сьцягам і чырвоная куртка са значком “Жыве Беларусь!”. Але ж я так апранаюся рэгулярна. І калі ў судзе лічаць, што гэта апазыцыйны выгляд, дык атрымліваецца, што мяне трэба хапаць і цягнуць у суд адразу, як толькі я выйшаў з пад’езду.
Але ж я не хаваю сваіх поглядаў. Яны ў мяне ёсьць, і я хаджу ў такім выглядзе. Але ж гэта не азначае, што я прыйшоў гэтым разам менавіта затым, каб прыцягнуць да сябе ўвагу. Я ўвесь час прыцягваю ўвагу. І паказваю свае адносіны да ўлады”.
23 сакавіка каля 20 чалавек з чырвонымі і белымі паветранымі балёнікамі прайшлі па месцах, зьвязаных зь дзейнасьцю міністра БНР Палуты Бадуновай. На 8 экскурсантаў супрацоўнікі міліцыі склалі пратаколы і абвінавацілі іх у парушэньні парадку правядзеньня масавых мерапрыемстваў.
Cудзьдзя Алег Харошка арыштаваў Сьвятаслава Шапавалава і Аляксандра Процку на 10 і 7 сутак адпаведна. Іншым удзельнікам экскурсіі прызначаныя штрафы: Івану Адаменку — 20 базавых велічыняў, Тацяне Бублікавай і Зьмітру Кутасаву — па 15.
Старшыня гомельскай гарадзкой філіі Аб'яднанай грамадзянскай партыі Андрэй Толчын, які прысутнічаў на судзе, распавёў нашаму радыё, што такіх судоў ён яшчэ ніколі ня бачыў, хоць прысутнічаў на дзясятках паседжаньняў:
“Судзьдзя Алег Харошка расцаніў два белыя балёнікі і чырвонае паліто ўдзельніцы экскурсіі як выраз палітычных поглядаў. Ён так і сказаў”.
Суду чакаюць яшчэ два ўдзельнікі экскурсіі — Сяргей Трыфанаў і Марыя Тульжанкова. Ні сёньня, ні ўчора яны ў суд не зьявіліся. Судзьдзя Алег Харошка паабяцаў даставіць іх у суд прымусова.
