Працягваецца вылучэньне кандыдатаў у склад акруговых выбарчых камісіяў на Барысаўшчыне
Яшчэ два прадстаўнікі Аб'яднаных дэмакратычных сілаў у Барысаўскім рэгіёне, Зьміцер Бабіцкі й Алег Мацкевіч, прадпрымаюць спробы патрапіць у склад акруговых выбарчых камісіяў, адпаведна №№62 і 63. Абодва зьбіраюцца вылучацца шляхам збору подпісаў жыхароў выбарчых акругаў. Для гэтага неабходна сабраць не меней ста подпісаў, паведамляе кампанія па маніторынгу выбараў ("Праваабаронцы за свабодныя выбары").
Вылучэньне Алега Мацкевіча, мабыць, будзе прадубляванае яшчэ рашэньнем арганізацыйнай структуры партыі "Беларускі народны фронт". Раней партыя АГП вылучыла ў склад акруговай выбарчай камісіі №62 Льва Марголіна - кіраўніка абласной арганізацыі Аб'яднанай грамадзянскай партыі.
Вылучэньне кандыдатаў у склад выбарчых камісіяў, як вядома, скончыцца 11 ліпеня.
