Берасьце: Вынікі фармаваньня акруговых камісій
Сёньня, 14 ліпеня, у Берасьці на сумесным паседжаньні прэзідыума абласнога Савета дэпутатаў і абласнога выканаўчага камітэта адбылося зацьвержданьне спісу 208 сябраў 16 акруговых выбарчых камісій.
Усяго вылучана 260 прэтэндэнтаў: 84- шляхам збору подпісаў, 65- ад грамадскіх арганізацый, 56 – ад палітычных партый і 55 – ад працоўных калектываў. Як падкрэсліў старшыня аблвыканкаму Брэсшчыны Канстанцін Сумар, які вёў паседжаньне, камісіі павінны працаваць такім чынам, как выбары прайшлі адкрыта й празрыста: “Ня трэба шукаць “блох” у кандыдатаў у дэпутаты”.
Карыстаючыся сваім правам, рашэньнем аблвыканкама ў акруговыя камісіі былі ўключаныя 14 прадстаўнікоў абласнога выканаўчага камітэта. У сваю чаргу прэзідыум абласнога Савета ўключыў яшчэ 14 сваіх прадстаўнікоў. Такім чынам, адразу 28 прадстаўнікоў тутэйшай улады трапіла ў склад акруговых камісій – “па ўладнаму спісу”: іх імёны не называліся.
Фактычна выбіралі 180 чалавек, вылучаных у камісіі. На гэты раз вырашалі, каб у камісіі выйшла максімальна дапусьцімая колькасьць сябраў – па 13 у кожнай. Было сказана, што ў кожную камісію трапілі прадстаўнікі ўсіх палітычных партый і што ня трэба дзяліць кандыдатаў на “чырвоных” і “белых”, “левых” і “чорных”. Тым ня меньш, найбольшае прадстаўніцтва ў складзе належаць “прапрэзідэнцкім” партыям: КПБ (9), Аграрнай (4), “Партыі працы й справядлівасьці” (3).
Брэсцкая абласная арганізацыя БНФ вылучала 9 кандыдатур у сябры акружных выбарчых камісій, алше туды трапіла толькі два чалавекі. Абласная арганізацыя АГП вылучала 8 чалавек, а ў камісіі апынулася таксама два сябра партыі. Яшчэ горш сітуацыя з сябрамі Грамады. Першая вылучала ў камісіі 4 сябры па чатырох акругах, дзе плануеца вылучэньне ў кандыдаты сябраў партыі, але ўключылі толькі аднаго. “Грамада” вылучала двух сябраў, уключылі аднаго.
Ня быў уключаны ў склад камісіі Сяргей Вакуленка, які вылучаўся па Брэсцкай цэнтральнай акрузе № 2 шляхам збору подпісаў. Як адказаў сябра Цэнтрвыбаркаму, начальнік галоўнага упраўленьня арганізацыйна-кадравай работы Аляксандр Каляда, у той акрузе была самая высокая канкурэнцыя: 22 прэтэндэнты на 13 месцаў, таму там не хапіла месца ўсім жадаючым.
Высокая канкурэнцыя склалася таксама ў брэсцкіх Заходняй, Усходняй, Мухавецкай выбарчых акругах, дзе вылучалася не меньш чым па 20 сябраў камісій. Найменьшая – па Івацэвіцкай выбарчай акрузе № 11: 14 чалавек на 13 месцаў. Сярод грамадскіх арганізацыяў самае шырокае прадстаўніцтва належыць “Белай Русі” і БРСМ – амаль у кожнай з 16 камісій.
З прадстаўнікоў апазіцыйных партыяў трапілі ў склад камісій Рыгор Бакіевіч (сябра БНФ – па Брэсцкай цэнтральнай выбарчай акрузе № 2) і Людміла Дзенісенка (першы сакратар Брэсцкай гарадской арганізацыі ПКБ – па Мухавецкай выбарчай акрузе № 4).
На працягу трох дзён пасьля сумеснага паседжаньня камісіі павінны выбраць свае кіруючыя органы.
“Праваабаронцы за свабодныя выбары”
