Віцебск: Агітацыю за кандыдата Аўчыннікава абавязалі праводзіць дворніка
27 верасня раніцай назіральнікі заспелі работніка па комплекснай прыборцы тэрыторыі (прасцей - дворніка) Маргалаву Алену Іосіфаўну за расклейваннем каля пад'ездаў дамоў Віцебскай-Чкалаўскай выбарчай акругі №18 агітацыйных улётак у падтрымку кандыдата ад улады Віктара Аўчыннікава. Побач яна клеіла перадрук крытычнага артыкула з газеты "Витьбичи" пра дзеючага дэпутата парламента і кандыдата ў дэпутаты Аляксандра Гудкова, які без узгаднення з уладай вылучыў сваю кандыдатуру.
Алена Іосіфаўна растлумачыла, што такую задачу перад ёй і іншымі работнікамі пад страхам звальнення паставіла начальнік ЖЭУ-22 Пруднікава Галіна Іванаўна.
Кандыдатам Аляксандрам Гудковым па дадзеным факце была накіраваная скарга ў акруговую камісію. У гэты ж дзень адбыўся разгляд скаргі, і ў камісію была выкліканая для разбіральніцтва начальнік ЖЭУ. Яна растлумачыла, што раніцай да іх прыйшоў "добра апрануты малады чалавек", які "за шакаладку" папрасіў распаўсюдзіць агітацыйную прадукцыю кандыдата Аўчыннікава і артыкул пра кандыдата Гудкова, на што яны пагадзіліся. Хто гэты малады чалавек і як яго зараз шукаць, па словах Пруднікавай, ёй невядома. Акруговая камісія з палёгкай уздыхнула: раз невядома, то і парушэння ў вядзенні агітацыі, а тым больш подкупу ў выглядзе "шакаладкі" няма.
"Праваабаронцы за свабодныя выбары"
