Смаргонскі райвыканкам спрабуе зачыніць незалежнае выданьне "Новую газету Сморгони". На 29 студзеня 2003 года перанесенае судовае паседжаньне ў Гаспадарчым судзе Гарадзенскай вобласьці па іску Смаргонскага райвыканкама да заснавальніка "Новой газеты Сморгони" Рамуальда Улана аб спыненьні яго дзейнасьці як прыватнага прадпрымальніка.
“На мой погляд улады могуць стварыць прэцэдэнт, ліквідуючы няўгоднае прадпрыемства за некалькі неістотных (на наш погляд) парушэньняў заканадаўства”, -- паведамляе выдавец газеты Улан Рамуальд
У якасьці абгрунтаваньня іску называюцца парушэньні падаткавага заканадаўства ў 2000 і 2002 г., два папярэджаньні пракуратуры ў 2000 г., парушэньні заканадаўства аб ахове працы і норм пажарнай бясьпекі ў 2002 годзе. Як паведамляе прэс-служба Беларускай асацыяцыі журналістаў, іск райвыканкама стаў адказам на спробы Рамуальда Улана пашырыць уласны бізнес і зарэгістраваць два новыя выданьні -- "Новую газету Островца" і "Новую газету Ошмян". Смаргонскі райвыканкам двойчы адмовіўся ўзгадніць размяшчэньне рэдакцый згаданых газет, што зрабіла немагчымай рэгістрацыю выданьняў. Двойчы - у снежні 2001 году і траўні 2002 - Гаспадарчы суд Гарадзенскай вобласьці прызнаваў гэтыя адмовы няпраўнымі.
Калі Улан, кіруючыся рашэньнем суда, трэці раз падаў у выканкам дакументы, улады адмовіліся ўзгадняць разьмяшчэньне рэдакцый, спасылаючыся на вынікі свежаправедзенай праверкі норм пажарнай бясьпекі, ды распачалі захады з мэтай спыніць дзейнасьць прадпрымальніка.
