Беларусь - сярод самых несвабодных дзяржаваў свету
Да такой высновы прыйшлі эксперты амерыканскай праваабарончай даследчай арганізацыі “Freedom House”. Гэта адзначана і ў штогадовай справаздачы арганізацыі пра правы чалавека ў свеце.
Ацэнкі Беларусі паводле “Freedom House” не змяняюцца ўжо шмат гадоў. Яна атрымала 7 балаў – найгоршую ацэнку стану палітычных правоў, і крыху лепшую ў 6 балаў – стану грамадзянскіх свабодаў. Старшыня Беларускага Хельсінскага камітэту Алег Гулак згодны з ацэнкай амерыканскіх праваабаронцаў:
- Тое, што сітуацыя ў нашай краіне застаецца вельмі складанай, я згодны. Што напрыканцы мінулага года мы бачылі пацяпленне і не было такіх брутальных парушэнняў — гэта так. Але сістэма парушэнняў засталася і нейкіх сур’ёзных зменаў, якія б дазвалялі лічыць, што Беларусь вышла на шлях дэмакратычных пераменаў, няма. Пра гэта яшчэ казаць рана. Пакуль гэта толькі чаканне.
У двадццатцы найбольш рэпрэсіўных рэжымаў Беларусь – адзіная еўрапейская краіна. Разам з ёй у гэты спіс трапілі: Паўночная Карэя, Саудаўская Аравія, Туркменістан, Узбекістан, Кітай, Куба, Зімбабвэ, Лівія і Судан.
