Суд па справе аб «экстрэмізме» ў «ARCHE» перанесены
Разгляд касацыйнай скаргі на рашэнне суда Маскоўскага раёна Брэста аб прызнанні шэрагу публікацый у часопісе «ARCHE-Пачатак» «экстрэмісцкімі матэрыяламі» перанесены на 7 траўня.
Пра гэта прэс-службе ГА «БАЖ» паведаміў адвакат Павел Сапелка, які прадстаўляе інтарэсы рэдакцыі ў судзе.
Скаргу разгледзіць судовая калегія па грамадзянскіх справах Брэсцкага абласнога суда (Брэст, вул. Савецкіх пагранічнікаў, 41).
Нагадаем: 25 лютага 2009 г. суддзя Маскоўскага раёна Брэста Таццяна Міранюк задаволіла заяву упраўлення КДБ па Брэсцкай вобласці ад 30 снежня 2008 г. аб прызнанні выдання экстрэмісцкім. «…Праведзеным аналізам устаноўлена, што ў часопісах утрымліваюцца звесткі, якія дыскрэдытуюць дзейнасць органаў улады і праўлення Рэспублікі Беларусь, узмацняюць сацыяльна-палітычную напружанасць і супрацьстаянне ў грамадстве, стымулююць здзяйсненне дзеянняў, накіраваных на арганізацыю і ажыццяўленне масавых беспарадкаў, і тым самым ствараюць пагрозу бяспецы Рэспублікі Беларусь», — сцвярджалася ў заяве за подпісам начальніка УКДБ, палкоўніка Леаніда Дзядкова.
Слуханні праходзілі ў закрытым рэжыме і доўжыліся ўсяго адну гадзіну.
