Баранавічы: мітынгі – без папярэдняй аплаты
Баранавіцкі гарвыканкам ня будзе больш патрабаваць ад арганізатараў вулічных мерапрыемстваў папярэдне аплачваць працу міліцыі, хуткай дапамогі й пажарнікаў. Гэтае рашэньне мясцовай улады было агучана сёньня на паседжаньні калегіі абласнога суду Берасьцейскай вобласьці.
На суд у Берасьце з Баранавічаў паехалі праваабаронца Сяргей Гоўша і юрыст Карней Пятровіч. Яны зьвярталіся са скаргай на неправамоцныя дзеяньні Баранавіцкага гарвыканкаму. Чыноўнікі патрабавалі, каб арганізатары вулічных мерапрыемстваў аплацілі загадзя — ажно за тыдзень — рахункі міліцыі, пажарнікаў і хуткай дапамогі.
Судовая калегія ў складзе Ніны Ўсьцінчук, Георгія Дзьмітрука (старшыня) і Анатоля Літоўчыка паведаміла заяўнікам, што такой праблемы больш не існуе.
“Як высьветлілася, у Берасьцейскі абласны суд учора паступіла ўжо новае рашэньне баранавіцкага гарвыканкаму. У ім яны адмянілі папярэднюю аплату. Я лічу, што гэта зьяўляецца прызнаньнем нашай праўды. Тым самым чыноўнікі прызналі, што незаконна патрабавалі папярэднюю аплату”, — паведаміў “Свабодзе” юрыст Сяргей Гоўша.
Ён лічыць, што актывісты атрымалі маленькую перамогу. Посьпех можа атрымаць працяг. Сяргей Гоўша разважае:
“Мы прасілі абласную калегію выйсьці з прапановамі па зьмене закону аб масавых мерапрыемствах. Гэты закон не адпавядае Канстытуцыі. Мы не павінны заключаць дамовы зь міліцыяй, МНС і г.д. Гэта павінна рабіць улада. Таму што кожны грамадзянін, які працуе, плаціць падаткі, на якія ўтрымліваецца менавіта дзяржаўная ўлада і яе чыноўніцкі апарат”.
