У Баранавічах судзяць чатырох маладафронтаўцаў, здымкі з акцыі якіх знішчаныя міліцыяй
Сёньня ў Баранавічах будуць судзіць актывістаў незарэгістраванай арганізацыі “Малады фронт” Арцёма Ластавецкага, Пятра Рузава, Сямёна Былінскага і Юр’я Багдановіча. Пра гэта паведаміў “Свабодзе” праваабаронца Сяргей Гоўша.
“Магчыма, што суд адбудзецца а 11-й гадзіне. Пра гэта мне заявілі ў дзяжурнай частцы Баранавіцкага ГАУС”, – удакладніў Сяргей Гоўша.
Учора ў Баранавічах насупраць гарвыканкаму маладафронтаўцы разгарнулі расьцяжку "Не – карупцыі!". Літаральна праз 10 хвілін міліцыянты затрымалі ўдзельнікаў акцыі. Арцёма Ластавецкага, Пятра Рузава, Сямёна Былінскага і Юр’я Багдановіча. Юнакоў кінулі ў міліцэйскую машыну разам з расьцяжкай і даставілі ў пастарунак.
Як стала вядома праваабаронцам, у той жа час на цэнтральнай плошчы, каля будынку гарвыканкама, быў затрыманы і Слава Болбат, які здымаў на фота ўдзельнікаў пікету. Міліцыя абвінаваціла яго ў тым, што ён пераходзіў вуліцу ў неўстаноўленым месцы. Былі выкліканыя супрацоўнікі ДАІ, якія склалі пратакол аб парушэнні правілаў дарожнага руху. Пры гэтым, у аддзяленні міліцыі ў дачыненні да Болбата быў праведзены дагляд, а з фотаздымача выдалілі ўсе фотаздымкі. Праз некалькі гадзін яго выпусцілі.
Нагадаем, што ва ўстаноўленыя заканадаўствам тэрміны ўдзельнікі акцыі падалі ў гарвыканкам заяўку на правядзеньне антыкарупцыйнага мерапрыемства, аднак пікет не быў дазволены.
