Бабруйск: “Агітацыя па правілах” пад наглядам камунальшчыкаў і міліцыі
Мясцовыя ўлады нарэшце вызначылі месцы, дазволеныя для агітацыі. Бабруйск не стаў выключэннем - гэта ўсё тыя ж малалюдныя закуткі і задворкі. У матэрыяле “Бабруйскага жыцця” пад назвай “Агитация по правилам” у нумары 17-м ад 19 сакавіка, пададзены не толькі спіс з адведзенымі месцамі, але і нумар артыкула, па якім будуць караць парушальнікаў гэтых правілаў. Гэта артыкул 21.14 – “парушэнне правілаў добраўпарадкавання і ўтрымання населеных пунктаў”. За тым, каб агітматэрыялы не з’яўляліся ў недазволеных месцах, па рашэнню гарадскіх уладаў будуць сачыць супрацоўнікі камунальных і дарожна-эксплуатацыйных службаў, а таксама УУС.
Для агітацыі кандыдатаў і давераных асобаў па Ленінскаму раёну выдзялілі памяшканні актавых залаў Цэнтра культуры па завулку Пяшчанаму, Цэнтра творчасці па вуліцы Чангарскай, а таксама адкрытыя пляцоўкі побач з футбольным полем спартовай школы па вуліцы Урыцкага. Для друкаваных матэрыялаў – інфармацыйныя стэнды на ўчастках для галасавання. Таксама прапісана, што для друкаваных матэрыялаў можна выкарыстоўваць інфармацыйныя стэнды на прадпрыемствах, арганізацыях і установах, - але для гэтага трэба будзе атрымаць згоду кіраўніцтва.
На тэрыторыі Першамайскага раёна для агітацыйных матэрыялаў адведзеныя інфармацыйныя стэнды на ўчастках для галасавання, інфармацыйныя шчыты каля ЖЭУ. На прадпрыемствах і рэкламных шчытах дарожна-эксплуатацыйнага прадпрыемства – на тых жа ўмовах, што і ў Ленінскім раёне. Для правядзення перадвыбарчай агітацыі кандыдатаў дазволілі выкарыстоўваць актавую залу Цэнтра гігіены і эпідэміялогіі, а таксама пляцоўку за крамай “Автомир”, якая знаходзіцца на скрыжаванні вуліц Мінскай і Арджанікідзэ.
Трэба адзначыць, што упраўленню ўнутраных справаў Бабруйскага гарвыканкама даручана “забяспечыць ахову грамадскага парадку ў месцах правядзення сустрэч кандыдатаў у дэпутаты з выбаршчыкамі”. Мясцовыя дэмакраты, што ўжо ўдзельнічалі ў выбарах у мясцовы Савет адзначаюць, што раней міліцыянты на сустрэчах з выбаршчыкамі не прысутнічалі.
“Праваабаронцы за свабодныя выбары”
