На думку міліцыі лічба “16” накіравана на ўчыненьне страты дзяржаўнаму і грамадзкаму парадку
Рада Сьветлагорскай раённай арганізацыі Таварыства беларускай мовы імя Францішка Скарыны (ТБМ) атрымала адказ начальніка мясцовага аддзела ўнутраных справаў на адкрытую заяву адносна агляду кватэры Вадзіма Богдана - сябра рэспубліканскай рады ТБМ. Сярод выданьняў, якія, на меркаваньне начальніка міліцыі, былі накіраваныя “на ўчыненьне страты дзяржаўнаму і грамадзкаму парадку” - налепкі з лічбай “16”.
Заява была прынятая 17 лістапада на паседжаньні Сьветлагорскай рады ТБМ з нагоды таго, што пры правядзеньні агляду кватэры супрацоўнікі міліцыі абвінавачвалі Вадзіма у фашысцкіх поглядах. У заяве таксама адзначалася, што на В. Богдана ў міліцыі аказваўся ціск пры ўзяцьці ў яго тлумачэньняў. Дакладнасьць усіх зьвестак, уключаных у заяву, была пацьцьверджаная В. Богданам - заява абмяркоўвалася і прымалася ў яго прысутнасьці.
У адказе М. М. Раговіча - начальніка раённага аддзела міліцыі, у прыватнасьці, гаворыцца: “У сувязі з заявай старшыні рады Сьветлагорскай раённай арганізацыі ТБМ Масьлюкова Т. В. паведамляю, што 11.11.2005 г. у апэратыўна-дзяжурную службу РАУС па тэлефону паступіла паведамленьне аб тым, што з кватэры (называецца адрас) зыходзіць пах, які характэрны для вырабу наркотыкаў. На думку тэлефанаваўшага, у кватэры вырабляліся наркотыкі. Для праверкі гэтага паведамленьня была накіраваная група супрацоўнікаў міліцыі, якія адпаведна з дзеючым заканадаўствам РБ ўвайшлі ў кватэру.”
Пры вонкавым аглядзе кватэры, адзначаецца далей у адказе, супрацоўнікамі міліцыі былі выяўленыя друкаваныя выданьні, у якіх апісвалася дзейнасьць незарэгістраваных палітычных рухаў "Зубр", "Белы легіён", клейкія буклеты з лічбай "16", наклейкі з надпісам "Сёньня Украіна - заўтра Беларусь", а таксама сьпіс адрасоў службовых асоб раёну. “З прычыны таго, што зьмест друкаванай прадукцыі накіраваны на ўчыненьне страты дзяржаўнаму і грамадзкаму парадку, супрацоўнікамі міліцыі было прынята рашэньне аб канфіскацыі друкаванай прадукцыі. У адносінах да Богдана В. М. быў складзены пратакол аб адміністратыйным правапарушэньні па арт. 167-10 Кодэкса аб адміністратыўных правапарушэньнях РБ” – паведамляе начальнік міліцыі.
Ніякага націску на В. Богдана супрацоўнікі міліцыі, лічыць начальнік, не аказвалі. Як адзначаецца ў адказе, па просьбе В. Богдана з дадзенымі матэрыяламі быў азнаёмлены прадстаўнік Беларускага Хельсінкскага камітэту, які, на меркаваньне начальніка міліцыі, парушэньняў заканадаўства не выявіў. В. Богдана ніхто з міліцыянтаў, гаворыцца ў адказе, у фашысцкіх поглядах не абвінавачваў.
