Актывіста БХД спрабуюць абвінаваціць у крадзяжы
Кіраўніка Берасцейскай абласной Рады БХД Зьмітра Шурхая па тэлефоне выклікалі ў РАУС Маскоўскага раёна Берасця. Яго быццам бы падазраюць у крадзяжы, сведкам якога нібыта быў чалавек, які пажадаў не называцца.
30 красавіка Зьмітру Шурхаю патэлефанаваў участковы інспектар РАУС Маскоўскага раёна Берасця Бычык Андрэй Вячаслававіч і выклікаў да сябе па справе аб “крадзяжы”. Паводле Бычыка, у міліцыю патэлефанаваў нейкі ананім і паведаміў, што 26 красавіка каля кафе “Лунный свет” бачылі, як Зьміцер Шурхай выйшаў са свайго аўтамабілю (назвалі марку і дзяржнумар), падыйшоў да пьянага мужчыны, што ляжаў ля кафе, і штосьці выцягнуў у таго з кішэні.
Актывіст БХД адмовіўся прыходзіць у міліцыю без павесткі, на што Бычык, як кажа Зьміцер Шурхай, пагрозліва сказаў, што, маўляй, не хочаш сам прыходзіць, “будзем з табой па-іншаму размаўляць”.
Зьміцер Шурхай лічыць гэтае абвінавачанне поўным абсурдам.
“Па-першае, 26 красавіка да абеду мяне не было ў Беларусі, па-другое, мой аўтамабіль да 1 мая знаходзіўся ў рамонце, - распавядае Зьміцер. - А па-трэцяе, я рыхтую скаргу ў пракуратуру на інспектара Бычыка за неабгрунтаванае абвінавачанне ды асабістыя пагрозы”.
Апроч таго, упэўнены Зьміцер, калі ўжо пачынаюць справу, спачатку з ім павінен быў звязацца ўчастковы па месцу прапіскі, а гэта Іванаўскі раён, што за 200 кіламетраў ад Берасця.
