Вернік Ян Міхайлаў апраўданы (дапоўнена)
4 траўня раніцай у Менскім райсудзе абвешчаны прысуд пра крымінальнай справе аб ўхіленьні ад вайсковай службы верніка Яна Міхайлава. Суддзя Вячаслаў Тулейка апраўдаў Міхайлава, які паводле папярэдняга прысуду амаль 3 месяцы знаходзіўся пад арыштам за ўхіленьне ад вайсковай службы.
На папярэднім пасяджэньні, 28 красавіка, пракурор Пастухова палічыла, што юнак парушыў артыкул 435 Крымінальнага Кодэксу і запатрабавала пакараць яго штрафам у памеры 200 базавых велічынь.
Нагадаем, што напрыканцы мінулага года, 15 сьнежня, Ян Міхайлаў быў затрыманы і пакараны арыштам на 3 месяцы за нібыта ўхіленьне ад вайсковай службы. Юнак практычна да канца адбыў тэрмін арышту. Аднак гэты прысуд быз прызнаны незаконным і справу накіравалі на перагляд. 10 сакавіка ён выйшаў на волю і знаходзіўся пад падпіскай аб нявыездзе.
На думку правааабаронцы Валянціна Стэфановіча, такое судовае рашэньне можна толькі вітаць. Яно прынятае цалкам у духу рашэньня Канстытуцыйнага суду 2000 года і Канстытуцыі Рэспублікі Беларусь, якая, у тым ліку, гарантуе права праходжаньня альтэрнатыўнай грамадзянскай службы. Праваабаронцы расцэньваюць апраўданьне верніка Міхайлава як перамогу грамадзянскай супольнасці краіны і першым крокам да ўвядзеньня Закону аб альтэрнатыўнай службе, а таксама з’яўленьня механізму рэалізацыі канстытуцыйнага права на праходжаньне альтэрнатыўнай грамадзянскай службы.
Гэта яшчэ важна і таму, што на сёньня ў Беларусі аналагічных судоў за ухіленьне ад прызыву на вайсковую службу чакаюць актывіст ствараемай партыі БХД Яўген Якавенка і гомельскі вернік Зьміцер Смык.
Варта таксама нагадаць што “Міжнародная амністыя” прызнала Яна Міхайлава вязнем сумленьня.
