Беларусь - у спісе краін з «найбольш рэпрэсіўным рэжымам»

Праваабарончая арганізацыі «Фрыдам Хаўс» (ЗША) ўключыла Беларусь у спіс краін з найбольш рэпрэсіўным рэжымам, паведамляе БелаПАН. Пра гэта гаворыцца ў штогадовым дакладзе, апублікаваным на афіцыйным сайце арганізацыі.

Беларусь разам з Чадам, Кітаем, Кубай, Гвінеяй, Лаосам, Саудаўскай Аравіяй і Сірыяй апынулася ў перадапошняй групе краін па ступені захавання і павагі да правоў чалавека. У апошнюю групу краін, дзе правы чалавека груба парушаюцца, уключаныя Бірма, Экватарыяльная Гвінея, Эрытрэя, Лівія, Паўночная Карэя, Самалі, Судан, Туркменістан, Узбекістан.

У разьдзеле, прысьвечаным Беларусі, адзначаецца, што ў краіне парушаюцца правы палітычных партый, грамадскіх арганізацый і грамадзян. Канстытуцыя, гаворыцца ў дакладзе, надзяляе прэзідэнта вельмі вялікімі паўнамоцтвамі, падаючы яму магчымасць кантраляваць урад, суд і «нават заканадаўчы працэс, так як ўказы прэзідэнта маюць прыярытэт над законамі».